Foro señala que l’asturianu nun pue ser “una arma de confrontación”

La web de Foro, etiqueta qu’utiliza FAC pa les xenerales, espublizó esti llunes una nota entitulada ‘L’asturianu: un patrimoniu común' firmada por Teresa Alonso. Nella señala que l’asturianu nun pue ser “una arma de confrontación”.
 
La responsable de política llingüística de Foro entama esti comunicáu declarando que “queremos que l’asturianu pase de considerase un problema a ser lo que realmente ye: una parte esencial del nuestru patrimoniu cultural. Un patrimoniu cultural que los asturianos heredamos, como pueblu y como país, de los nuestros mayores, y que tenemos el compromisu moral de tresmistir a los nuesos fíos”. P’Alonso, promover la llingua asturiana “non nos empequeñez. Engrandeznos” y abre les puertes al mundu: “Defender el nuesu idioma vernáculu nun nos fai menos españoles. Fainos más. La nuesa riqueza llingüística tien de sirvir como preséu vertebrador d’Asturies; pero tamién d’España, proxectándose al restu de comunidaes autónomes y a la esfera internacional”, continúa.
 
Darréu, la diputada na Xunta Xeneral afirma que nun tien que ser difícil atopar una solución a esta situación pese a tar años “dando-y vueltes a la tema del asturianu”, porque “tenemos un estatutu que nos manda promover el bable. Disponemos d'una llei d’usu que regula la manera de facelo. Y esfrutamos d'una Constitución que considera que’l nuestru idioma propiu tien de ser oxetu d'especial respetu y protección”. Por último, Alonso resalta que “nun podemos facer del nuestru idioma una arma de confrontación. El futuru del nuestru patrimoniu llinguísticu nun pue depender de los equilibrios ente partíos: L’asturianu nun pertenez a nenguna ideoloxía. L’asturianu pertenez a tolos asturianos. Por eso faise necesariu, por eso faise imprescindible, por eso faise obligatoriu algamar un consensu de mínimos tocante a esta cuestión”.