Foro refuga la propuesta del PP de Xixón de crear un espaciu na ciudá pa homenaxar la bandera española

El gobiernu municipal de Foro nun ve necesariu un espaciu na ciudá pa homenaxar la bandera española, como pretendía’l PP de Xixón. Los populares queríen siguir los pasos d’otres ciudaes del Estáu como Madrid o Santander.

Rafael Felgueroso, conceyal de Seguridá Ciudadana, respondió a los ediles del PP que la bandera española yá tien el so espaciu na puerta de la Casa Conceyu y que los ciudadanos tienen problemes más importantes que crear un espaciu pa exhibir la bandera española. El miércoles, el partíu rexíu por una xestora na ciudá sorprendió a toos cola anuncia d’un ruegu al Conceyu nel que pidía un llugar pa “rindir homenaxe” a esti símbolu, propuesta que finalmente nun va salir alantre.

L’asuntu de la bandera foi ún de los puntos que se trataron nel Plenu celebráu güei, nel que destacó l’aprobación, por unanimidá, d'una propuesta del PP d'ellaborar una declaración institucional na que se solicita al Gobiernu que declare la Universidá Llaboral como Bien d’Interés Cultural (BIC).