Foro reclama proteición énte los ataques del osu y del llobu recientes

"El conseyeru nuevu Lastra tien que solucionalo", afirma Carmen Fernández. Esta selmana cuatro oveyes xaldes resultaron muertes por un plantígradu en Cangas.

La diputada y vocera en materia d'Agroganadería señaló que “la proteición del osu nun pue poner en peligru l'actividá económica y la integridá de les persones qu'habiten na zona rural", pa depués puntualizar que Foro "celebra'l satisfactoriu proceso de recuperación del osu" n'Asturies, ensin dexar de llau l'esmolecimientu "pola necesidad de compatibilizar esti desarrollu poblacional de la especie, que cada vez coloniza más partes del territoriu, cola actividá económica tradicional, sobre manera la ganadera, y tamién cola simple convivencia diaria nos núcleos rurales asturianos nos que cada vegada resulta más frecuente observar la presencia del plantígradu, col peligru qu'esta circunstancia supón pa los habitantes d'esos llugares y los daños que l'animal ocasiona sobre'l ganáu y les colleches". Por ello considera que Fernando Lastra "tien que solucionar la proteición personal y patrimonial de los asturianos énte los ataques del osu y del llobu que caleyen impunes peles nueses zones rurales”.

Esta demanda de Foro vien tres l'ataque'l domingu por parte del osu en Cangas del Narcea que provocó la muerte de cuatro oveyes xaldes, el segundu en 15 díes. “La solución ta nel equilibriu y control de depredadores y nes indemnizaciones xustes y rápides pa nun poner en peligru de desaniciu a otres especies como la oveya xalda o la (cabra) bermeya”, apunta Fernández.