Foro reclama 666 millones p'Asturies nos Presupuestos Xenerales del Estáu

El diputáu Enrique Álvarez Sostres y el senador Isidro Martínez Oblanca anunciaron esti llunes que van presentar 26 enmiendes parciales a los Presupuestos Xenerales del Estáu. Foro reclama 666.118.280 millones d'euros p’Asturies.

Tres astenese na votación a les enmiendes a la totalidá de los Presupuestos nel Congresu, que nun salieron alantre gracies a los votos en contra del PP y UPN, Foro de Ciudadanos señaló que va presentar estes 26 enmiendes parciales repartíes en cuatro ministerios: 15 en Fomentu, siete n’Industria, dos n’Educación y una n’Economía. A elles hai que sumar una más xeneral respeuto a cómo se articularon los Presupuestos. "El Principado ta discrimináu de forma nidia respeuto a otres comunidaes autónomes", señaló Álvarez Sostres.

Martínez Oblanca tachó estos Presupuestos de “’ni-ni’”, ya que sostién que "nin respuenden a les necesidaes nin aporten soluciones". Pela so parte, Álvarez Sostres aseguró qu’estes enmiendes "respuenden al mandatu constitucional y equilibriu territorial". Darréu, el senador instó al Gobiernu de Mariano Rajoy a "concluyir les grandes obres yá executaes nel 2013". Amás aseguró que "hai que recuperar el tiempu perdíu n’Asturies", yá que considera que "les consecuencias podríen ser aciagues". "Foro tendrá una actitú dialogante" y mantendrán una "crítica constructiva", añadió’l diputáu.

Entre les enmiendes que presenta Foro destaquen como les más costoses "l’aceleración y conclusión" de la variante de Payares con un total de 102.337.000 millones d’euros y les ayudes a les empreses productores de carbón, que sumen 160.000.000 millones d’euros.