“Foro reafírmase como l’únicu partíu qu’antepón los intereses del Principáu d’Asturies”, diz Pumares

“La sociedá asturiana esixía esti cuartu congresu”, afirmó Adrián Pumares, secretariu xeneral de Foro, una vez fináu’l procesu de refundación de la formación. Con esti pasu “reafírmase como l’únicu partíu qu’antepón los intereses del Principáu d’Asturies”, añadió’l tamién diputáu, que confirmó que “tamos recibiendo altes nueves”.

En declaraciones a Asturies.com, el llavianés amosó la so satisfaición pol desendolcu de IV Congreso Extraordinario de Foro Asturias, baxo’l lema ‘Refundarse para centrarnos en Asturias’, nel que s’aprobaron estatutos nuevos y se presentó una imaxe nueva. “Foi dalgo esixíu y desáu pola mayor parte de la militancia, y mui necesario”, asina como por “la sociedá asturiana”, analizó.

“Foro Asturias reafírmase como l’únicu partíu qu’antepón los intereses del Principáu d’Asturies”, siguió Pumares, que confesó que “dende’l sábado recibimos numberoses llamaes, tanto de persones afiliaes como non afiliaes, pa felicitanos pol pasu dau. Amás, tamos recibiendo numberoses altes, lo que ye una bona señal”. Una vegada fináu’l procesu, nel que Foro dexó atrás cualquier tipu de venceyu col so fundador, Francisco Álvarez-Cascos, Pumares apuntó que va centrase dafechu n’intentar “defender les nueses polítiques”.

Sobre la postura de Foro énte la próxima apertura del procesu de reforma del Estatutu d’Autonomía, el diputáu recordó que la so formación “tien un únicu diputáu na Xunta Xeneral, y poro, nun-y toca esi papel protagonista”. “Como fiximos siempre, trabayaremos con rigor cualesquier asuntu, tamién el de la reforma del Estatutu”, aseguró.

A la espera de la propuesta

El votu del llavianés considérase clave pa l’actualización del testu estatutario, yá que cola FSA, Podemos y Asturies pela Izquierda (IX-IAS), partíos más favoratibles a modificalu, sumen 26 y son necesarios trés quintos del Parllamentu, esto ye, 27. Ente los asuntos que los socialistes van plantegar ta la cooficialidá del asturianu y del gallego-asturiano, un asuntu que Foro va estudiar nel momentu nel que conoza la propuesta concreta de la formación liderada por Adrián Barbón.

Na semeya, Carmen Moriyón, presidente de Foro, y Pumares el sábadu nel congresu.