Foro, PP, VOX y Suárez xunen el votu pa llantar una bandera d'España de grandes dimensiones nel xixonés L'Humedal

Tamién alcuerden dedicar un espaciu nuevu na villa pa crear una 'plaza de España'.

Xixón, siguiendo'l camín d'Uviéu, y magar los costos altos que supón el so caltenimientu y restitución, como se ta viendo cola instalada na Escandalera, va tener una bandera d'España de grandes dimensiones. La propuesta de VOX, la primera y única presentada no que va de llexislatura, contó col sofitu del conceyal qu'abandonara la formación, Óliver Suárez Rubio, y de los dos partíos del gobiernu, Foro y PP, mentes que votaron en contra PSOE, Convocatoria por Xixón y Podemos.

Ésta va llantase en L'Humedal, yá que l'alcaldesa Carmen Moriyón retiró sobre la marcha la enmienda pa que nun tuviera que ser precisamente nesi llugar. Usuarios en redes sociales alvierten de la intención simbólica de VOX d'asitiala onde taba l'antigua plaza Los Mártires.

La presidenta de Foro tamién quitó la segunda, preferida al allugamientu d'una 'plaza de España' na villa, que plantegaba la eliminación d'esti puntu na proposición de VOX. Finalmente, tolos representantes de la derecha, con mayoría nel Plenu, alcordaron que se cree nun espaciu nuevu, con preferencia nel nomáu Solarón o nos terrenos de Naval Xixón que pretende adquirir el Conceyu.

Na semeya, terrenos conocíos popularmente como Solarón y, al fondu, L'Humedal.