Foro pide al Gobiernu estatal una Llei d’Autoridá Pública del Profesor

Enrique Álvarez Sostres, diputáu de Foro de Ciudadanos nel Congresu, rexistró una proposición non de llei pal so debate na Comisión d’Educación. Pide al Gobiernu estatal una Llei d’Autoridá Pública del Profesor.
 
La intención del partíu asturianu con esta midida ye garantizar la homoxeneidá del sistema escolar nesta materia. Según esplica Álvarez Sostres na so iniciativa, namái la Comunidad de Madrid, la Comunitat Valenciana y La Rioja llexislaron al respeuto, incorporando esi concepto a la so normativa. En concreto, les trés lleis autonómiques coinciden nel so artículu primeru en fixar como oxetivu reconocer y reforzar la autoridá del personal docente nel exerciciu de les sos funciones, cola fin de meyorar la calidá del sistema educativu y garantizar el derechu a la educación. Con too ello, el parllamentariu de Foro quier que s’equipare la llexislación a aplicar en tol Estáu pal reconocimientu del profesoráu como autoridá pública mediante la so introducción na Llei Orgánica d’Educación del 2006 o nel Estatutu del Profesoráu futuru.
 
Álvarez Sostres considera que los cambios sociales, el desprestixu de les instituciones y la disminución del respaldu de les families, provocó nos tiempos últimos la perda de l’autoridá del profesor. Al so xuiciu, el docente nun siente anguaño’l l’apoyu de la propia sociedá nin de la llexislación, pa exercer la so autoridá nes aules, lo que deriva en problemes d’indisciplina, que na so manifestación más grave supón casos d’insultos, amenaces y de violencia física contra’l docente, non sólo a manos d’alumnos, sinón tamién de los pas. "Faise necesario, pues, reforzar l’autoridá del profesor, que sufre munches vegaes la situación de desproteición respeuto a alumnos y families, con una llexislación clara que lu considere una autoridá pública”, agrega’l diputáu asturianu.