Foro mantuvo un grupu de trabayu con sectores del asturianismu

|

Foro Asturias mantuvo esti llunes en Xixón un grupu de trabayu con sectores del asturianismu pa informar de les llinies de la so política llingüística. La formación apuesta por una presencia tresversal del idioma en toles árees del Gobiernu.
 
L’aconceyamientu, al qu’acudieron unes 40 persones del asturianismu cultural, contó con una representación importante del partíu llideráu por Francisco Álvarez-Cascos, cola presencia del senador Isidro Martínez Oblanca; el conseyeru de Cultura y Deporte, Emilio Marcos Vallaure; la conseyera d’Educación y Universidaes, Ana Isabel Álvarez González; el direutor xeneral de Política Llingüística, Alfredo Ignacio Álvarez Menéndez; y el conceyal por Noreña, Inaciu Iglesias Fernández. L’oxetivu del alcuentru, según esplicaron, yera informar de les llinies de la so política llingüística y entamar un grupu de trabayu pa establecer un Plan 2012-2016 p’avanzar na normalización de la llingua asturiana. Nesi sen, dende Foro señalaron que la idea de poner en marcha esti proyeutu taba meditada dende hai tiempu y que la convocatoria de les eleiciones anticipaes trestocó los planes iniciales.
 
L’intención de Foro en matería llingüística ye apostar por una presencia tresversal del idioma en toles árees del Gobiernu y non arrequexalu a una estaya determinada, como pasaba nes llexislatures anteriores. D’igual forma, considera perimportante la introducción del idioma nel currículu d’Infantil (de 3 a 6 años), el reconocimientu de la especialidá docente de Llingua Asturiana y l’agame d’una mayor presencia del asturianu nos medios de comunicación. Otra manera, Álvarez Menéndez confirmó nel alcuentru la intención de Foro de siguir trabayando na recuperación toponímica y anunció la espublización nos díes próximos d’un nomenclátor con tolos topónimos oficiales del país –que va poder descargase na rede– pa que sía utilizáu en toles estayes de l’Alministración y por tola ciudadanía en xeneral.
 
El públicu presente, que llanzó delles entrugues a los responsables de Foro, fixo énfasis na so preocupación polos recortes al asturianu y a l’Academia de la Llingua Asturiana. L’argumentu utilizáu pa xustificalos foi que toles estayes sufrieron recortes a esceición d’Educación, Sanidá y Bienestar social, árees que’l Gobiernu consideró intocables, y que finalmente la prórroga presupuestaria obligó a tomar midíes más drástiques. Por último, Foro quixo refrendar la so apuesta pol asturianu y gallego-asturianu, que consideren una parte fundamental del patrimoniu asturianu; un exerciciu de llibertá pa los ciudadanos y una obligación pal Gobiernu.
 
Na semeya, Martínez Oblanca, Álvarez González, Marcos Vallaure, Álvarez Menéndez y Iglesias Fernández.

Comentarios

Bona noticia ye ista,si de verda se pode  confiar.Asina meritan todos los votos asturianistes,que van dir perdios pa quien non  fai    nada por ASTURIES !
Que el PP y el PSA non van  facer nada por nuesa coltura,ya ta sabiu ...Solu enfotaos pa Madri !

Á pachu, qué se supón que ye PSA??? Y si tu te crees lo del asturianismo de FORO, allá tu, a mi nun me la cuelas...

Güevu,el  PSA ye el partiu socialista asturianu ( Meyor dichu'd  Madri)  Yo mesmu non lo creo,poro  el  fechu de axuntase  ye una bona cosa.   Fiame de ningun non!
Si prefieres dar el to votu a daquien, que  meyor ayuda a los palestinos, failo ! Tamos fartos de mas de lo mesmu. Por iso sabemos que solu un personaxe con tiron, pode facer daque por Asturies.
Si non probamos non vamos lloñe ! Ta mas que claru...preste o non preste.

Exemplu de la politica llingüistica de FORO:
Con FORO gobernando na ciudá, el nomatu Xixón, oficial, desaniciose fasta'l puntu de desapaecer de los cartelos municipales. Asina usa FORO la llingua: faltando a la lley que'l propiu ayuntamientu xixones fizo nomando Gijón/Xixón como nome OFICIAL del conceyu. Ridiculo ye ver a Rubiera xustificalu diciendo que nun lo usen porque nun quieren ferir sensibilidaes. FORO, pa la llingua , pior que PSOE-IU. ¡Quien diba suponelo! Colo asturianistes que son ellos...

Contador Estadistiques