Foro La Ribera llamenta la falta d'actividaes nel conceyu na Selmana de les Lletres Asturianes

Borja Fernández, candidatu a l'alcaldía de La Ribera, llamentó la falta d'actividaes nel conceyu na Selmana de les Lletres. "Ye una bona oportunidá p'atraer visitantes", afirmó.

"Ye una pena que La Ribera nun cuente con nenguna actividá propia nel conceyu dientro de la programación de la XXXVI Selmana de les Lletres Asturianes. L’alcalde tendría que facer daqué pa que'l nuesu conceyu tenga alguna presencia nesta Selmana que tien tanta visibilidá y ye tan importante”, apuntó'l tamién presidente de Foro La Ribera, que considera qu'esta celebración "ye una bona oportunidá pa facer diferentes actividaes nel nuesu conceyu pa promocionar la llingua y la cultura d’Asturies, poder atraer visitantes y dar a conocer La Ribera al restu del país” añadió.

Fernández propón "la realización d’actividaes como conciertos, esposiciones o un mercadín de llibros que se pueden facer cola collaboración d’asociaciones culturales, hosteleros y centros educativos del conceyu”.“Hai que dinamizar culturalmente el conceyu La Ribera y la cultura asturiana tien que xugar un papel fundamental", finó.