Foro impulsa nel so programa eleutoral el conocimientu y espardimientu de la cultura asturiana

Emilio Marcos Vallaure y Marcos Niño presentaron esti llunes el programa de Cultura y Deporte de Foro de Ciudadanos. La formación de Francisco Álvarez-Cascos apuesta por impulsar el conocimientu y espardimientu de la cultura asturiana.
 
Ente les iniciatives anunciaes nesti aspeutu destaca l’establecimientu d’una política de caltenimientu, estudiu y espardimientu del patrimoniu cultural d'Asturies, la creación d’un inventariu del patrimoniu usando les nueves teunoloxíes, la promoción d’una rede de museos, el potenciamientu del papel del Muséu de Belles Artes y el Camín de Santiago, el desarrollu d’un plan d'apoyu a la ópera y la zarzuela, la creación d’un Conseyu de Patrimoniu y la reclamación del ún por cientu Cultural del Estáu. Coles mesmes, Foro va apoyar a Llaboral Centru d'Arte como epicentru del arte contemporaneu y va pidir una auditoria independiente del antiguu Centru Niemeyer. Al respeuto, Vallaure dixo que la so formación "nun ta en contra" d'esti centru, pero insistió na necesidá d'esclarar les cuentes del equipamientu.
 
No que se refier al patrimoniu llingüísticu, l’hasta agora conseyeru apostó por potenciar, dignificar y normalizar l'usu de la llingua al traviés d'un Plan pa la normalización social del asturianu y del gallego-asturianu 2012-2016, como yá comentara nel aconceyamientu celebráu en Xixón con sectores del asturianismu hai una selmana. Según esplica’l programa de Foro, esti plan permitiría la “planificación y coordinación de toles actuaciones en materia de política llingüística: inclusión del asturianu nel ciclu d’Educación Infantil (3 a 6 años), reconocimientu de la especialidá de Llingua Asturiana y Gallego-asturianu na enseñanza non universitaria, completar la revisión y recuperación toponímica, aumentar la presencia del asturianu y del gallego-asturianu nos medios de comunicación, etc”.
 
Sobre'l papel de les Biblioteques Públiques, Vallaure consideró que tienen que siguir siendo pieces esenciales de la cultura, puesto que son l'equipamientu más usáu polos asturianos, con más de trés millones de visitantes. Por ello, propunxo reforzar la so posición y crear una Llei de Biblioteques que permita'l so desarrollu.
 
Ensin munchos cambios
 
Foro plantegó tamién nel programa, que nun sufre munchos cambios, reorientar una política cultural nesti momentu "en coma" pa recuperar íntegramente los valores d'Asturies, dixo Vallaure. Pa ello, va fomentar el diálogu y va llamar a la participación y collaboración  efeutiva de tolos protagonistes de la vida cultural.   Na so opinión, la sociedá tien que xugar un papel fundamental como dinamizadora de la cultura. Esto reflexaráse nuna nueva llexislación de mecenalgu, lo que va suponer una meyora sustancial de les condiciones pal estímulu directu de la cultura per parte de la iniciativa privada.
 
Otra manera, nel aspeutu deportivu, Niño esplicó que l'apuesta de Foro apoyaráse sobre la concepción del deporte como motor pal desarrollu social, cultural y económicu. Nesta llinia, apostará por crear una nueva llei del deporte asturianu, un plan integral pa l'actividá física y el deporte, y l’entamu d’una fundación público-privada pal patrociniu d'estes actividaes. Coles mesmes, va promover la Ciudá del Deporte de Llamorgal, va invertir nes estaciones d'esquí y va crear la marca 'Asturies, Paraísu Deportivu'.