Foro encarga una auditoría de les cuentes del partíu dende la fundación nel 2011

La Comisión Direutiva presidida por Moriyón decidiólo nuna xunta na que nun participaron los críticos, partidarios d'Álvarez-Cascos.

Foro va encargar una auditoría de les cuentes del partíu dende la so fundación. Según esplicó'l secretariu xeneral, Adrián Pumares, la razón d'esta aición ye silenciar les crítiques a la direición que tán llegando dende redes sociales por parte de dalgunos militantes.

Nesti aconceyamientu de la Comisión Direutiva nun acudieron, como anunciaren, los partidarios de Francisco Álvarez-Cascos, fundador de Foro enfrentáu nes selmanes últimes a la presidenta actual, Carmen Moriyón. Asina'l congresista Isidro Martínez Oblanca, en Madrid, o'l diputáu Pedro Leal auséntaronse xunto a otros críticos.

Na so intervención, Pumares tornó a ratificar la postura de Foro sobre la oficialidá y defendió'l desarrollu de la Llei d'Usu y Promoción del Bable/Asturianu.