Foro critica'l tratamientu a Asturies en llibros de testu, que dependen de los propios centros

El conseyeru Genaro Alonso reconoz que correspuende a Inspeición Educativa vixilar que los conteníos sían los correutos.

El diputáu de Foro y voceru en materia educativa, Pedro Leal, treslladó esta mañana nel Plenu de la Xunta Xeneral al titular d'Educación y Cultura'l so esmolecimientu sobre'l tratamientu que recibe Asturies nos llibros que s'empleguen nos colexos del país. "Hai testos d'Historia mui deficientes que nun faen referencies al ‘Reinu Astur’, o se refieren a ‘un tal Pelayo’, y inclusive borren del mapa el ‘Reinu d'Asturies’ para sustituyilu por ‘Reinos Cristianos’ o sustitúin la llingua asturiana pola ‘asturlleonesa’. Un profesor nun pue aprovechar la so posición na escuela pa trensmitir información equivocada a los escolinos faciéndola pasar por ciencia”, aseguró. En concreto, na so entruga escrita respeuto al idioma rexistró como ún de los errores atopaos "afirmar qu'esiste una fala que nun tiene la consideración de llingua que ye l'asturlleonés –que non asturianu–".

Por ello, entrugó a Alonso sobre qué tipo de control y, nel so casu, d'homologación se fai o pue realizar l'Alministración educativa del conteníu de los llibros de testu. “Dende l'Alministración ha d'evitase que los llibros de testu contengan información adulterada; nun se trata de censurar, simplemente de cuidar que los escolinos tengan una formación veraz y ensin manipulaciones”, apuntó.

La respuesta del conseyeru foi que los centros educativos tienen autonomía pa escoyer los llibros de testu que s'empleguen nes sos aules y que'l so departamentu nun s'encarga d'autorizalos u homologalos. Sicasí, reconocío la esistencia d'errores en dalgunos conteníos referentes a Asturies y apuntó que correspuende a Inspeición Educativa'l vixilar qu'éstos sían correutos, apuntando que'l númberu de denuncies de padres al respeuto ye baxu.