Foro critica que’l Reglamentu de Patrimoniu nun mente l’asturianu nin el gallego-asturiano

El Reglamentu de Desarrollu de la Llei de Patrimoniu Cultural d’Asturies ye “ineficaz” y “insuficiente” pa Foro, que presenta alegaciones al mesmu. Critica que nun mente l’asturianu nin el gallego-asturiano, ente otres carencies del anteproyeutu.

Según apuntó la diputada María del Mar García Poo, el documentu debería recoyer una referencia a estes dos llingües “como bienes integrantes del nuesu patrimoniu inmaterial”. Ésta ye la primer carencia destacada por Foro d’una llista que tamién inclúi como errores del Reglamentu de Patrimoniu el nun establecer un réxime propiu pal Inventariu de Patrimoniu Cultural d’Asturies, ser incoherente colos Catálogos Urbanísticos, non desarrollar la Llei con respeuto al Camín de Santiago, presentase como un documentu confusu y contrariu a la norma en materia de Mediu Ambiente y Ordenación del Territoriu, nun mostrar coordinación ente la llexislación d’urbanismu y la llexislación sobre patrimoniu cultura cuando incide en temes urbanísticos, y non desendolcar la normativa xeneral en cuanto al patrimoniu etnográficu.

García Poo entiende que l’anteproyeutu nun pue ser consideráu un Reglamentu Xeneral “yá que nun desarrolla tol conteníu de la Llei 1/2001 del Principáu d’Asturies de Patrimoniu Cultural y amás resulta contrariu a los principios afitaos nesta”. “El documentu, ellaboráu con 12 años de retrasu y presentáu a información pública en plenes fiestes navidiegues –un 23 d’avientu–, con un plazu de namái 20 díes pa presentar alegaciones y ensin la posibilidá de conocer la opinión de la conseyera de Cultura enantes de la finalización del mentáu periodu, contién ausencias evidentes, disposiciones contraries a la Llei y desatenciones al patrimoniu d’Asturies”, continuó la diputada forista, qu’anunció que’l so grupu yá solicitó “la comparecencia de la conseyera d’Educación, Cultura y Deporte pa qu’esplique en sede parllamentaria’l documentu” y conocer asina tamién “la opinión de la responsable máxima d’Asturies en materia cultural”.

Por último, señaló que Foro solicita nes alegaciones la paralización del reglamentu presentáu por Cultura y una tramitación nueva del mesmu p’algamar un documentu “al altor de lo qu’esixe la defensa del patrimoniu asturianu”.

Na semeya, San Salvador de Corniana. Imaxe obra de José Antonio Gil Martínez.