Foro, Convocatoria por Asturies y PP llamenten que Cultura nun tenga una conseyería específica

El partíu asturianu, en representación del grupu mestu, y la coalición sofiten les midíes de normalización llingüística de la viceconseyería.

"Quiero empezar llamentando que nun haya una conseyería específica de Cultura y además viose güei con claridá porque tuvimos que tratar temes que son tan estremaos como cultura, retu demográficu, turismu o alministración pública", arrancó Adrián Pumares, diputáu de Foro, nel turnu de fixación de posiciones na sesión de la Comisión de Presidencia, Retu Demográficu, Igualdá y Turismu de la Xunta Xeneral pa presentar l'aición de gobiernu por parte de la vicepresidenta y conseyera Gimena Llamedo. "Además nos próximos años vamos tener que facer frente a una fola reaccionaria que va intentar atacar y facer de menos la nuesa cultura, además con argumentos falsos y con eslóganes simplones", siguió'l llavianés, qu'emplegó l'asturianu na parte que tenía que ver cola estaya de cultura.

"Independienteme de que supuestamente dependa directamente del presidente Barbón, creo que nun ye adecuao que daqué tan importante como la cultura seya una simple viceconseyería", concluyó. Sobre la Llei d'Usu y Promoción del Bable/Asturiano, apuntó que "apoyaremos la reforma o desarrollu" de la mesma al creyer "necesario siguir avanzando nesa promoción y normalización de la llingua asturiana".

Xabel Vegas, que nun interviniera nel turnu d'entrugues, sí fixó posición, momentu nel que confesó, en castellanu, que "al mio grupu parllamentariu-y gustara que la cultura y la política llingüística tuvieren rangu de conseyería, ente otres coses porque eso permitiera contar nesta Cámara con una comisión llexislativa específica a tal efeuto, entá más cola frustración que supunxo la fallida reforma del Estatutu d'Autonomía na pasada llexislatura pa una parte de la población asturiana". Sicasí, el diputáu de Convocatoria por Asturies confía en que "la cultura y la defensa y promoción de la llingua asturiana y del eonaviego sía una de les grandes prioridaes y de les señes d'esti Gobiernu, y cónstanos que'l presidente Barbón, que quixo asumir eses árees, posee una particular sensibilidá hacia les nueses llingües. Y que la viceconseyera de Cultura, Política Llingüística y Turismu, Ana Vanessa Gutiérrez, ye una persona comprometida col idioma, y dende equí queremos desea-y el mayor de los aciertos y ufri-y la nuesa total collaboración".

El Partido Popular (PP), en boca de José Agustín Cuervas-Mons, señaló, tamién en castellanu, que "desconozo por qué de la conseyería d'Adrián Barbón, Presidencia, faise depender Cultura. Coincidimos nesti casu con Foro, entendemos que Cultura debería tener una conseyería propia". "Pretender que por depender del señor Barbón esto ye más importante, yo nun lo entiendo", añadió.