Foro Asturias destitúi a José Luis Cienfuegos y coloca a Nacho Carballo al frente del FICXixón

José Luis Cienfuegos, alma mater del Festival Internacional de Cine de Xixón (FICXixón), nun va siguir al frente del certame. FAC decidió destituyilu como direutor del mesmu, cargu que va ocupar el cineasta xixonés Nacho Carballo.

Carlos Rubiera, conceyal d’Educación, Cultura, Mocedá y Festexos, anunció esta decisión güei xunto al propiu Carballo y María Teresa Sánchez, xerente del Teatru Xovellanos. D’esta forma, Cienfuegos, que garró les riendes del certamen nel 1995, dexa’l cargu de direutor del FICXixón nel añu nel que’l festival cumple 50 años. Na so intervención, Rubiera señaló que considera esti aniversariu un momentu afayadizu p'abrir un ciclu nuevu na historia del festival y destacó de Carballo que ye un home de cine dispuestu a entornar la so esperiencia y entusiasmu pa llograr un proyeutu ambiciosu y ilusionante, pero al empar realista. Y anque resaltó que confíen dafechu na so capacidá y talentu, adelantó que-y esixirán una xestión "rigurosa" de los recursos públicos que tea dirixida a intereses de los ciudadanos y a la proyeición esterior de la ciudá. "Pidímoste que faigas más con menos", repostió.

Pela so parte, Carballo agradeció la confianza puesta nél y el llabor del equipu que trabayó nel festival estos años, al que tendió la mano por si quieren siguir collaborando nel certame. El cineasta alvirtió que non sólo nun vien a romper col tipu de festival qu'había, sinón que va potencialo, anque con un puntu de vista nuevu, "evitando'l personalismu", y abriéndolu a too tipu de públicos, "non sólo una audiencia especial y intelixente", como se-y denomina. D’igual forma, pidió la complicidá de la sociedá asturiana y abrió la puerta a cualquier empresa que pueda participar ensin nengún tipu de discriminación. L'oxetivu, al so paecer, ye que'l certame valga de vehículu propulsor fuera d'Asturies d’una producción audiovisual nacional de la que dixo que nun debe ún avergoñase. Ello ye qu'apeló a la deuda del festival colos productores asturianos.

Ente les novedaes qu’anunció’l xixonés, destacó una primer gala d'Asturies y un mercáu audiovisual asturianu onde van tar tanto los que viven n'Asturies como los que trabayen fuera pa poner de mancomún idees qu'ayuden a sacar al sector de la "pésima" situación que vive. Nel so equipu, amás, van tar Jorge Iván Argiz; Jaime Vega, alministrador y precursor del mercáu asturianu; Jesús Parrado, coordinador de ciclos; y Juan José Plans, comisariu de la esposición aniversariu y ex direutor del certame.

Carballo apuntó, amás, qu'anque nun ye una prioridá, va haber alfombra colorada nel L FICXixón, dao qu’entiende que nun ye incompatible con un festival independiente y que trayer a xente conocida pa rentabilizar el certame ye un revulsivu. Quierse, tamién, incorporar una nueva estaya de cine internacional, producciones televisaes, el 3D y l'animación dixital. "Siempre fui un soñador y creo nesti suañu", dixo.

Pela so parte, la xerente del Xovellanos esplicó que la decisión comunicóse-y esti mesmu día a Cienfuegos, al que tendrán qu'indemnizar y al que van ofrecer, en too casu, collaborar. Tamién agradeció-y el so trabayu, pero indicó que se zarra una etapa y entama otra.

Bloque-UNA de Xixón pide esplicaciones

Nun comunicáu asoleyáu güei, Bloque por Asturies-Unidá Nacionalista Asturiana (UNA) de Xixón reclamó a Rubiera que “esplique de forma argumentada, si ye a ello, los motivos de la destitución de Cienfuegos como direutor del FICXixón y la so sustitución pol direutor nuevu”, yá que, según la coalición, “nun paez bono d'argumentar la destitución del responsable d'un festival que con baxu presupuestu consiguiera unes cotes d'aceptación peraltes ente crítica y públicu trabayando con presupuestos bien inferiores a los d'otros festivales asemeyaos”. D’igual forma, los nacionalistes eloxaron el llabor de Cienfuegos nestos 16 años últimos al frente d’un certame que “conxugaba una identidá vanguardista y cosmopolita, con un apueste pola creación asturiana, con iniciatives como'l Día de Asturies que se convirtieren nun escaparate del cine fechu nel país”.