Foro acusa al PP de buscar xenerar “refugu y antipatía” hacia l’asturianu

|
Foro acusa al PP de buscar xenerar “refugu y antipatía” hacia l’asturianu

“La proteición del bable/asturianu y la promoción del so usu nun ye sinónimu de ‘cooficialidad a la catalana’ como agora pretende facer creer el PP a los asturianos”, defende Pedro Leal. El diputáu de Foro na Xunta Xeneral acusa a los populares de poner en marcha una campaña pa xenerar “refugu y antipatía” hacia la llingua asturiana.

Nunes declaraciones feches esta mañana pol vicesecretariu d’Aición Sectorial de la formación, en respuesta a una entrevista a Luis Venta, secretariu xeneral del Partido Popular (PP), nel diariu ‘La Nueva España’ entitulada “Foro no ha sido claro en contra de la cooficialidad, y en el PP de ahí no nos bajamos”, señala que dicha campaña popular va destinada “a los sectores más reaicionarios del Principáu”, pa depués añadir que “el programa de Foro ye públicu, conocíu, nidiu, inequívocu y incuestionable na proteición y defensa del patrimoniu llingüísticu de los asturianos, porque nun actuamos como reaición a la izquierda radical nin a golpe d’ocurrencies nin improvisaciones”. Leal considera que’l PP ta “radicalizándose en dalgunes cuestiones, contradiciéndose inclusive col so pasáu reciente, nesa particular campaña que comenzó hai tiempu de cara a les eleiciones autonómiques del añu próximu, intentando facer creer qu’asumen un lideralgu ideolóxicu del que nun disponen”.

“Nun dexa de ser sorprendente  que los que nun estudien los problemes d’Asturies nin trabayen nes sos soluciones habitualmente plaxen el discursu de Foro o lu combaten de manera demagóxica, pero son poco coherentes coles idees de les que s’apropien, como fai’l PP en numberoses ocasiones, como por exemplu n’agroganadería col problema del llobu o la pesca del salmón, n’infraestructures cola necesidá de l’autovía La Espina-Cangas del Narcea o les razones de fiscalidá pa oponese al Plan de Residuos que se ta tramitando; son prueba nidia d’ello”, apunta Leal. El diputáu encamienta nesi sen a Venta a que se responsabilice de diseñar una estratexa nel so propiu partíu “que tenga como fin solucionar los problemes verdaderos de los asturianos”.

Contador Estadistiques