Foro aclama a Moriyón como presidenta y refuga incluyir una referencia a Asturies nos sos estatutos

El lII Congresu de Foru vien d'escoyer a l'alcaldesa de Xixón, Carmen Moriyón, como la so presidenta y candidata a la Presidencia del Principáu. Amás, el cónclave cellebráu esta fin de selmana en La Pola Siero rexistró la salida de Francisco Álvarez-Cascos de la secretaría xeneral. L'ex-presidente de la formación pasa agora a ser vicepresidente, un cargu de creación nueva que lleva arréyau funciones de "asesoramientu."

 

Precisamente, la reforma los estatutos foi la única novedá d'esti Congresu, una y bona nun se planteara siquier una ponencia ideolóxica, talo y como asocede davezu nos congresos d'otres formaciones. La enmienda que plantegaba criar esa vicepresidencia salió p'alantre gracies al sofitu de los compromisarios.

 

De fechu, los asistentes aprobaron siete de les ochu planteagaes, toes elles rellacionaes cola criación d'esti cargu nuevu. Namás una, la que llevaba'l númeru ún y roblaba Justo Sierra Salcines, diba empobinada a modificar la definición ideolóxica de los estatutos. Nel so artículu 2, el referente a la so ideoloxía, Foro defínese dende la so fundación en 2011 como un "partíu reformista de centru con vocación europea."

 

La enmienda que sí resultó aprobada amesta agora un un apueste pola "integridá territorial de la Nación española." Sicasí, nun salió alantre un segundu apartáu que, d'aprobase, diba representar la única mención a Asturies nos estatutos del partíu. Nesi testu, finalmente refugáu, Foru declarábase herederu "de los valores y de los signos d'identidá que conformaron a lo llargu los sieglos la cultura, la economía y la organización territorial d'Asturies, constituyendo exa prioritaria de la so aición política la defensa de los mesmos."
 

El Congresu, nel que nun se vió bandera asturiana ninguna, desenvolvióse, sicasí, embaxu el lema "La fuerza de los asturianos" y acabó con tolos asistentes cantando l'Asturies Patría Quería. De la nueva dirección nun forma parte ningún de los asturianistes históricos que hasta agora tuvieren cargos de representación na formación.

 

 

Anque Foro dexa fuera de la so definición ideolóxica la referencia a Asturies, el discursu de Carmen Moriyón centróse na reivindicación d'un cambiu p'Asturies que ponga "l'alta velocidá en dirección al progresu" y reivindicó Foro como un partíu que "nun ye nenguna sucursal".

 

Nuna intervención na qu'hubo referencies a la igualdá de xéneru, al caltenimientu del mediu ambiente o a la defensa del carbón como "fonte d'enerxía autóctona", malapenes hebo referencia al patrimoniu cultural, anque sí al monumental y natural, nin a la llingua asturiana.