Fórmula 0 n’Indianápolis

A la fin, tolos equipos que calzaben cubiertes Michelin decidieron nun tomar la salida nel Gran Premiu de los EEUU de fórmula 1, en dulda dende les sesiones d'entrenos nes que dellos coches que montaben ruedes d'esta marca sufrieron misteriosos arreventones de ruedes nes partes más rápides del circuitu, provocando ello accidentes graves a más de 300 kilómetros por hora como'l de Ralf Schumacher (Toyota). La falta de seguranza de les gomes, pa la que los técnicos de la marca francesa nun alcontraben esplicación, llevó a los equipos Michelín, que son la mayoría de los participantes, a proponer un ultimatum: o la organización aperiaba una "chicane" delantre de la zona onde les gomes de Michelin tendíen a españar pa menguar la velocidá y el riesgu d'arreventón, o nun participaben na carrera.

La organización del mundial nun cedió y a la fin, anque los equipos Michelin dieron la vuelta de reconocimientu, en cuenta de dir a la parriya de salida entraron ún tres d'otru a les cocheres en señal de protesta, abandonando oficialmente'l Gran Premiu. La carrera, si ye que pue llamase asina, sigió alantre cola participación namás de los coches de Ferrari, Jordan y Minardi, los trés equipos que lleven cubiertes de la marca Bridgestone, acabando'l desfile en primera posición Michael Schumacher. Tolos equipos Michelin emitieron un comunicáu oficial de disculpa, mientres que l'asturianu Fernando Alonso reconoció personalmente que-y mancaba el tener que tomar esta decisión de plantar a tolos aficionaos del mundu pero que nun-yos quedaba más remediu. La organización del mundial de Fórmula 1, encabezada por Bernie Ecclestone, reconoció que la Fórmula 1 taba cabante de vivir el mayor bochornu de tola so historia.

Fernando Alonso sal dañáu d'esta carrera. Si de la qu'entamaba la parte americana del calandariu coles carreres del Canadá y de los EEEUU Fernando Alonso anunciaba que contaba con sumar munchos puntos nestos dos circuitos que favorecíen muncho'l so coche, lo cierto ye que l'asturianu va volver a Europa ensin sumar un puntu y viendo como se-y multipliquen los enemigos. Raikonen primero al ganar en Canadá y Schumacher dempués al aprovechar el "regalu" d'Indianápolis, tan agora a 22 y 25 puntos d'Alonso na xeneral.