Fonoastur celebra quince años de discos asturianos

La discográfica asturiana Fonoastur cumple 15 años, y pa celebralo entama dos conciertos nel Auditoriu Príncipe Felipe d'Uviéu esti fin de selmana.

Dambos conciertos van xuntar a munchos de los músicos que formaron y qu'entovía son parte de la historia d'esta casa discos. El primer conciertu entama esti sábadu 28 a les 19:30, y nelli van tocar los grupos "Llan de Cubel" y "La Bandina", el cuentacuentos y l'humorista "Milio del Nido". Va haber tamién un númberu especial de cantares de ciegos y l'actuación de la cantante de tonada Mari Luz Cristobal Caunedo, pero los invitaos especiales d'esta nueche van ser, ensin dulda, el grupu escocés "Ceolas", la banda del gaiteru Fred Morrison.

Pal otru día tenemos otra tarde-nueche bien llarga y enllena de música, colos grupos folk "Felpeyu" y "Llangres" el gaiteru Diego Pangua, l'espectáculu de "Muyeres" y la vocalista Esther Fonseca, nuna sesión na que participen tamién los históricos Nuberu, y la Banda de gaites La Raitana, acabante de presentar discu nuevu. Pa esta día tamién hai invitaos especiales, colos bretones Jean Baron y Christian Anneix, que tamién ponen clas esti fin de selmana nun cursu praparatoriu pal Macallan en Villanueva de Santu Adrianu.

Ta previsto que cada conciertu dure al rodiu de dos hores y media, dando sobre la media hora d'actuación cada grupu, faciendo'l restu de participantes pequeñes representaciones de los sos repertorios, recibiendo namás que "Ceolas" el tratu especial de tar un hora enriba l'escenariu.

Les entraes cuesten 9 euros pa cada conciertu, pero tamién podéis mercar un bonu de 15 euros pa los dos díes hasta esti xueves 26. Ye interesante mercar el bonu, porque col resguardu d'elli Fonoastur fai un descuentu de 3 euros nun triple cd que ta acabante sacar n'edición numerada y de luxu col que se quier pega-y un repasu a la evolución discográfica d'esti sellu. Al traviés de 63 temes, el CD recupera momentos importantes de Fonoastur, tocando tolos palos dende les bandes de gaites y el folk hasta los trabayos de cantautores y d'estilos más nuevos como'l pop/rock.