Fomentu marca’l 2013 como l’añu nel que va tar terminada dafechu l’Autovía del Cantábricu

Belén Fernández, conseyera de Fomentu, Ordenación del Territoriu y Infraestructures, anunció que pal 2013 va tar terminada dafechu l’Autovía del Cantábricu. El tramu ente Muros y Las Dueñas va abrise al tráficu esti mesmu añu.
 
Na so intervención nel Parllamentu, Fernández detalló les llinies principales del so programa de Gobiernu y señaló que les feches pa la finalización de l’Autovía del Cantábricu son les que-y comunicó hai dalgunas selmanes la propia ministra de Fomentu, Ana Pastor, que, en pallabres de la conseyera, ye consciente del déficit que tien Asturies en materia viaria y ferroviaria. Asina, si nun hai novedaes nueves, los ciudadanos van poder percorrer l’añu qu’entra tola costa asturiana, dende oriente a occidente, per autovía tres la finalización del tramu Unquera-Pendueles, el que más retrasos ta acumulando de los cuatro pendientes.
 
La socialista tamién anunció que les trés primeras fases de la Y de Bimenes terminaránse esti añu, mentes que la cuarta, en Lieres, prorrogaráse hasta los primeros meses del 2013, asina como Corigas-Cabanaquinta, mentes que destacó la necesidá d’avanzar nel tramu de la A-63 entre Rodriga y Curniana, que "merez abrise y ponese en serviciu". Tamién, en materia viaria, informó, a entrugues d’UPyD, de que’l ministeriu nun contempla planes d’actuación específicos pa un tramu nuevu de la N-364, a la altura d’El Bao, que se solucionará cola entrada en serviciu’l tramu Otur-Villapedre de l’A-8.
 
No que respeuta a l’Alta Velocidá Ferroviaria, subrayó qu’Asturies aspirará de forma irrenunciable a garantizar el tráficu amestáu de viaxeros y mercancíes, dao’l papel "crucial" qu’éstes tienen pa la economía nacional. Tamién destacó que’l trazáu nuevu permite aforrar 30 quilómetros en distancia y un tiempu estimáu de trés cuartos d’hora. Con too, Fernández reconoció que la ministra nun-y treslladó nengún plazu concretu pa la obra, más allá de la pretensión de finar cola obra civil y contratar en breve la superestructura.
 
Por último, a entrugues d’IX, señaló que’l Gobiernu nun descarta un trazáu con anchu de vía internacional ente La Pola Ḷḷena y Xixón, anque apuntó la necesidá d’esperar al estudiu informativu d’Adif pa "nun asolapar posiciones que dilaten los procesos en marcha".