Fomentu abre’l tramu ente La Doriga y Corniana diez años depués del comienzu de les obres

Cola presencia del ministru de Fomentu, Íñigo de la Serna, y del presidente Javier Fernández, na mañana del martes abrióse’l tramu de l’AS-63 ente La Doriga y Corniana diez años años depués del comienzu de les obres. El popular punxo de fecha pa la llegada a Salas de l’autovía que va xunir Uviéu y La Espina'l 2020.

De 2.300 metros de llargor, esti tramu tien un total de cinco estructures amás d’un viaductu sobre’l ríu Narcea, con 875 m de llonxitú y un altor de 75 metros sobre’l fondu del valle. Les obres tamién incluyeron la realización d’un enllaz en Corniana.

La inauguración, prevista depués de munchos retrasos pa setiembre, celebróse finalmente esta mañana con un actu nel que tuvieron presentes De la Serna y Fernández. El presidente del país calificó l’apertura como una “mui bona noticia”.

Podría dedicame a llamentar el retrasu, pero nun-y veo utilidá nenguna. Prefiero ser más práuticu y celebrar que s’abra al tráficu y que se reanuden los trabayos hacia Salas”, añadió Fernández. Éstos taríen finaos pal 2020, según marcó De la Serna, tando agora completáu un 35 por cientu de la obra.

Los trabayos nel tramu ente La Doriga y Corniana, que xune esta población a Uviéu per autovía, dieron comienzo nel 2007 con un plazu d’execución de 3 años y mediu, pero quedaron paralizaos nel 2010 y nun se retomaron hasta’l 2015. El costu total d’esti tramu foi de 43,8 millones d’euros.

L’AVE, tamién pal 2020

En branu del 2020 debería llegar l’alta velocidá a Asturies, según los cálculos de De la Serna. Pa dientro d’un añu prevé que se solucione’l ‘fondu de sacu’ de Lleón, lo que sumao a la finalización del tramu Lleón-La Robla nel 2019 y l’apertura de la variante de Payares, dexaría’l viaxe ente Xixón y Madrid en 3 hores y 21 minutos.

Finalmente, los dos túneles de la variante van tener anchu internacional, con un vía mesta nún de los tubos pa permitir el pasu de mercancíes.