Folk y una Big Band pa pasar el fin de selmana en Tinéu

Los responsables del discu Dual siguen colos conciertos de presentación del so primer discu como dúu. Esta vegada Lisardo Prieto col vigulín, y Ígor Medio col bouzouky, van dir hasta Tinéu pa tocar esti sábadu 25 xunta unos bonos amigos d'ellos, Tuenda. Primero d'ello, el vienres ye'l turnu de de la Big Band de la Escuela de Música de Llanera. El conciertu de la formación musical, que dirixe Baldomero Gutiérrez -saxu nos Ciquitrinos- y qu'igüen 25 mozos y moces, entama a les 20:30 hores nel Cine Marvi. La entrada ye de baldre.

Per otru llau, el conciertu del sábadu tamién ye nel Cine Marvi y cola entrada de baldre, pero la hora d'entamu ye a les 19:00 hores. Pa la tarde d'esti sábadu 25 el Conceyu escoyó a dos grupos de folk qu'anque nuevos, tán formaos por músicos con esperiencia abondo nos escenarios y nos estudios de grabación. Per un llau van tocar Lisardo Prieto y Ígor Medio, los dos componentes de Felpeyu, y qu'echaron andar va poco andar un proyectu musical nel que ponen los sos instrumentos al serviciu de dellos temes instrumentales, pero sobre too, pa cantares nos que musiquen poemes d'escritores asturianos. Tamién va tar Tuenda, qu'apuesta por pasar pela so visión la tradición vocal asturiana, meciendo nel so discu y nos sos directos la voz del cantante Xosé Ambás (N'Arba) cola xiblata de Pepín de Muñalén (Bandina'l Tombo) y el bouzouky d'Elías García.