Folk <I>quebecoise</I> na nueche celta d'Ayer

Esti sábadu día 7 celébrase una de les nueches celtes con más tradición y prestixu d'Asturies, como ye la de Soto d'Ayer, qu'alcanza cola d'esti añu la VII edición, meyorando en cada convocatoria. Anque dende les 8 de la tardi va haber una muestra de folklore allerán, lo más gordo del cartel ye la presencia del grupu asturianu Llan de Cubel, qu'esti veranu nun se dexó ver tanto como otres veces per Asturies. La banda de Fonsu Mielgo y Simon Bradley tien que repartise'l protagonismu cola actuación del grupu de folk quebecoise Les Battinses. Los canadiensos, que presumen de mecer folk jazz, funk y rock, alegándose per momentos al soníu de los grupos balcánicos, son la presencia estranxera que más llama l'atención d'un cartel nel que tamién tan los irlandeses Beginnish y los gallegos Liorna. La representación asturiana complétenla los grupos Tarañu, Milicia Astur y Folkgando, que cuenta cola presencia del espertu guitarrista Rafa Kas. N'acabando la música, la organización d'esta VII nueche celta tuvo'l detalle de contratar autocares que, dende les cinco la mañana, fadrán servicios parando per tolos pueblos d'ayer hasta llegar a Mieres.