Folixa pola Paz pa esti domingu

El Conseyu de la Mocedá de Xixón, Acción en Red Asturies y la Coordinadora de ONGD del Principáu d'Asturies presentaron la segunda edición de la Folixa pola Paz que va tener llugar nel Muséu del Pueblu d’Asturies de Xixón, dende les 12 de la mañana hasta les 20.30 hores el domingu 24 de xunetu.

Per segundu añu consecutivu organízase esta xornada coles mires d'espublizar los principios de Paz y Non Violencia en contraposición a la celebración esi mesmu día del Festival Aéreu “Ciudá de Xixón”. Les organizaciones qu'entamen esta Folixa pola Paz consideren que'l festival aéreu represente unos valores probelicistas, y n'él "subyacen los valores de violencia, obediencia acrítica y despreciu pola vida humana que constitúin la base de los exércitos". 

La folixa entamará  cola llectura d'un manifiestu, pa dempués seguir con cuentacuentos y un taller de bombes de grana. Les actividaes de pela mañana cierrales el grupu de música tradicional Os Penoutas. Pela tarde habrá un concursu gastroeróticu pa promocionar la diversidá sexual y el respetu a toes les identidáes de xéneru, seguíu d'un taller de dances circulares del mundu y dellos talleres infantiles. Pa finar tendrá llugar los conciertos de Acústica y Polinomio. Tamien tan previstes dos exposiciones, una  sobre los refuxaos ellaborada  con trabayos de profesionales de la illustración y del diseñu d'Asturies que denuncien la barbarie de la crisis de los refuxaos, y otra con imáxenes d'Alejandro Zapico sobre'l borbardeu sobre Xixón nel 1937.  Amás tará disponible pa los asistentes una barra solidaria con bedida y productos de comerciu xustu.