Flook, Mosaic, Corquiéu y La Col.lá Propinde participen na Folixa na primavera d’esti añu en Mieres

Ayeri presentóse oficialmente la Folixa na Primavera de Mieres, una celebración qu'esti añu en que llega a la so XI edición tien acutaes en calandariu los díes del 7 al 9 d'abril y na que la música del arcu atlánticu va compartir espaciu otra vuelta más cola gastronomía y cola sidra que van poner los cerca de venti llagareros collaboradores.

L'Alcalde de Mieres Luis María García y la conceyala de Festeyos y Turismu, Isabel Sánchez encabezaron la presentación d'esta Folixa na que rescamplen, como ye tradición, los dos grandes conciertos de les nueches del vienres y del sábadu. La organización acutar pa cada nueche a un grupu de casa y otrui nternacionales, y asina la primer gran nueche, el vienres 7, van xubir al escenariu en primer llugar el grupu de Ribeseya Corquiéu y tres d'elllos la banda británica Flook, dos conocíos de vieyo del públicu asturianu. Mientres que los primeros, que cuasimente nun precisen de presentación, van ufiertar los temes del so segundu discu "Salia", los segundos son tamién conocíos tamién del públicu astur depués de dar dellos conciertos a lo llargo del pasáu 2005 na nuestra xeografía. Sicasí, ye una bona ocasión pa ver a esti grupu de maxistrales intérpretes colos temes del so nuevu discu "Haven" pol que consiguieron el premiu de la BBC al meyor grupu de folk y nel que s'inxerta un tema dedicáu a Asturies.

Pal sábadu queda asina l'actuación en primer llugar del grupu de L.lena La Col.la Propinde que presenta'l so nuevu discu "Güeria", mientres que en segundu llugar va xubir al escenariu la banda "Mosaic" un grupu formáu por 8 músicos irlandeses ente los que llama l'atención el curdionista Alan Kelly y que fai un amiestu de música tradicional, salsa y jazz. Tolos miembros de Mosaic son xente esperimentao y en xunto tienen más de 100 discos grabaos ente toos ellos. La so actuación ye inédita dafechu, y va ser la primer vegada qu'esta banda actúe n'España.