Firmose'l conveniu pal parque de la Sidra

El Principáu y l'Ayuntamientu de Nava firmaron ayeri'l conveniu pa desarrollar el Parque Empresarial de la Sidra, un polígonu que va concentrar tola actividá industrial sidrera de la comarca y va ser tamién el llugar pa que guañen otres iniciatives empresariales nueves rellacionaes col mundu de la sidra y la manzana, como centros d'investigación o empreses de control de calidá. El polígonu va ocupar una superficie de 82.475 metros cuadraos pa la parte de Villabona, ente la salida de Nava y la carretera n-634. La realización del Parque de la Sidra ye una de les iniciatives de desarrollu local más importantes que vienen faciéndose nestos años y ye la última obra apadrinada por Xulián Fernández Montes, primer alcalde asturianista de la historia que va dexar el cargu por decisión propia y nun va presentase a la reelección nes elecciones del mes qu'entra.