Firefox n’asturianu yá ta disponible pa teléfonos intelixentes

Softastur ta acabante d’anunciar la versión en llingua asturiana de Firefox pa teléfonos intelixentes, tanto pa los qu’empleguen el sistema operativu iOS como Android. D’esta forma los usuarios pueden restolar n’asturianu nos sos dispositivos móviles, tal como veníen faciendo n’ordenadores dende l'añu 2010.

Pa descargase’l Mozilla Firefox, el restolador web llibre y de códigu abiertu más popular, namái ye necesario entrar nes tiendes d’iOS y Android, esto ye, Apple Store y Google Play, de manera respeutiva. Tamién ye posible facelo dende la páxina de Firefox, tanto pa iOS como p’Android.

La comunidá asturiana que puxa pol software llibre apunta que “en tolos casos, tendrás que dir a los axustes del to smartphone, y na configuración, camudar la llingua a ‘Asturianu’”. Esti avance desendolcáu por Softastur ye mui importante pa la llingua asturiana, yá que yera la piedra angular que faltaba nos teléfonos intelixentes, onde yá se pue emplegar l’idioma n’asturianu en dellos dispositivos Android y nos iPhone dende hai unos meses depués de la incorporación del idioma al CDLR.

D’igual forma, dende’l coleutivu encamienten al usu del software n’asturianu pa la presencia del idioma nes estadístiques sobre les visites y llingües del mundu, dalgo fundamental a la hora de que les empreses informátiques tengan en cuenta la llingua asturiana.