Finó'l socialista Fernando Morán, ex ministru d’Esteriores con González

L’avilesín Fernando Morán finó esti miércoles en Madrid a los 93 años. Persona con una amplia carrera diplómatica, ocupó la cartera d’Esteriores mientres los años 1982 y 1985, nel primer Gobiernu de Felipe González, tiempu nel que negoció la entrada d’España na Comunidá Económica Europea (CEE), y foi senador por Asturies.

Llicenciáu en Derechu y Ciencies Económiques na Universidad de Madrid, actual Complutense, foi ún de los fundadores del Partido Socialista del Interior (PSI) nel 1967, que s’integraría nel PSOE nel 1978 tres reconstituyise años enantes como Partido Socialista Popular (PSP). Como diplomáticu tuvo n’Arxentina, Portugal y Reinu Xuníu, llegando a ser depués senador por Asturies, ente los años 1977 y 1982, y miembru del ente preautonómicu d’Asturies como conseyeru.

Con González entraría nel Conseyu de Ministros como responsable d’Asuntos Esteriores. Nesti tiempu llevó les negociaciones pa la entrada d’España na CEE, actual Xunión Europea, y reabrióse la valla de Xibraltar.

En xunetu del 1985 pasó a ser embaxador ente Naciones Xuníes y llueu foi eurodiputáu nes primeres eleiciones al Parllamentu Européu celebraes nel Estáu, cargu que caltuvo 13 años. La so carrera política siguió como conceyal ente’l 1999 y 2000, cuando l’abandonó.

Adrián Barbón, presidente d’Asturies, calificólu esta mañana como “un asturianu de pro, un asturianu universal”, destacando “que pasó a la historia como persona fundamental na negociación pa la incorporación d’España a la entós Comunidá Económica Europea”. Tamién quixo recordar que “foi un lluchador pola democracia y la llibertá”.

Na imaxe, Manuel Marín y Morán observen a González mientres firma nel Palacio Real de Madrid el 12 de xunu del 1985 el tratáu pol qu'España entra na CEE. Semeya propiedá del Ministeriu de Presidencia del Gobiernu d'España.