Finó Mael Caldevilla

El psicólogu y militante nacionalista morrió'l domingu a los 58 años por un infartu.

Mael Caldevilla, natural de Xixón anque pasó los sos primeros años de vida en Degu, dexónos ayeri tres años de militancia asturianista y una destacada llabor profesional. Dende la so etapa universitaria, cuando foi secretariu xeneral de la seición moza de la Hermandad de Donantes de Sangre de Gijón y miembru de la xunta direutiva de Xuventudes Musicales d’Asturies, tuvo mui involucráu en llabores sociales.

Ye nesi tiempu, a finales de los 70, cuando, dende postulaos comunistes, s'avera a tesis nacionalistes. Asina, llega a trabayar xunto a dos compañeros nun estudiu comparativu de campu sobre'l bilingüismu n'Asturies, que s'espublizaría nel 1986. No que respeuta a la so militancia política, foi miembru de la de la executiva nacional del Ensame Nacionalista Astur y, darréu, de la Unidá Nacionalista Asturiana. La so trayeutoria finaría nel Partíu Asturianista (PAS), del que formó parte tamién de la executiva nacional, llegando a ser candidatu nes eleiciones estatales del 2000.

Caldevilla tamién participó acitivamente nos movimientos cívicos de defensa del asturianu, llegando inclusive a ser presidente de la Xunta pola Defensa de la Llingua Asturiana y impulsor de los premios añales del coleutivu que lleven el nome del so collaciu Andrés Solar. D'igual forma, el xixonés destacó como promotor lliterariu.

Calca equí pa visitar la web profesional de Mael Caldevilla.