Finó Félix Ferreiro, coautor del primer manual d'enseñu de Llingua Asturiana

|
Félix Ferreiro

L'académicu tenía 78 años d'edá.

Esti vienres dexábanos n'Uviéu Félix Ferreiro, que fora maestru y xefe de serviciu de Política Llingüística na década de los 90. El so llabor foi especialmente importante nos 80, nos años primeros de la escolarización en Llingua Asturiana, cuando asoleyó xunto con Pablo Manzano 'Reciella', el primer manual d'enseñu de la materia editáu pola Academia de la Llingua Asturiana (ALLA) nel 1985 dientro de la coleición 'Escolín', que contó con cuatro ediciones, o'l 'Diccionariu Básicu de la Llingua Asturiana', nesti casu tamién con Urbano Rodríguez.

Ferreiro contó con obra lliteraria en gallego-asturiano y yera miembru habitual de xuraos de premios como’l Fernán Coronas, onde coincidió en delles ocasiones con Inaciu Galán, agora vocal de Rellaciones Institucionales d'Iniciativa pol Asturianu, que destacó d'él la xestión de "la política llingüística en momentos difíciles, onde había qu’abrir cuasi tolos caminos de cero" al tiempu que'l coleutivu llamentó la so perda. Tamién tuvo pallabres de recuerdu Xosé Antón González Riaño, presidente de l'ALLA, que calificó la muerte del académicu como "una perda irreparable pa la cultura y la educación n'Asturies".

 

Contador Estadistiques