Fina Steve Jobs, cofundador d’Apple y ún de los principales motores de la evolución informática

Na madrugada del xueves –hora asturiana– morrió Steve Jobs, cofundador d’Apple y ún de los principales motores de la evolución informática con creaciones como los ‘Mac’ o’l ‘Iphone’. Un cáncer de páncrees finó cola so vida.
                                                                                  
Steven Paul Jobs, de 58 años de edá, padecía esta enfermedá dende hai dellos años y dexó la direición executiva d’Apple nel mes d’agostu por esti motivu. Esta decisión xeneró munches duldes alredor de la empresa, yá que se considera a Jobs como artífice de munchos de los sos ésitos comerciales.
 
El de San Francisco fundó Apple xunto col so collaciu de l’adolescencia Steve Wozniak nel garaxe del so llar. El so primer gran ésitu foi la creación del Apple II nel añu 1977, primer ordenador diseñáu producíu en masa pal so consumu, lo que lu convirtió nun ventiañeru multimillonariu. Nel 1984 creó’l Macintosh, una computadora que revolucionó’l mercáu y les costumes de munches persones alredor del mundu. Sicasí, por problemes cola direición de la empresa que fundó foi despidíu y fundó Next, empresa qu’Apple mercaría nel añu 1997.
 
Nunos años pasó a ser direutor executivu de la compañía, cargu que mantuvo hasta agostu. Nesti tiempu tuvo como grandes ésitos’l desarrollu del ‘Iphone’, aparatu que permitió a Apple consolidar el so lliderazgu mundial nel terrén de les nueves teunoloxíes, y revolucionó’l cine d’animación con Pixar, otra compañía de Jobs que mercó Disney nel 2006.