Fina Paco Mori, militante históricu del nacionalismu asturianu

Esti miércoles morrió n'Uviéu a los 87 años Francisco Alonso Mori 'Paco', un históricu del movimientu nacionalista asturianu. Militante de XNA y UNA, foi pioneru n'Asturies del enseñu del inglés y trabayó tamién na defensa de la natura dende ANA.

"Mori foi ún de los neños de la guerra. Coló de Xixón en direición a Francia p'acabar en Catalunya, que taba daquella baxo dominiu republicanu. Ehí creó una fuerte convición antifranquista que lu llevo, non a militar, pero si a tar cerca del PCE", esplica José Luis Carmona, candidatu a l'alcaldía de Xixón de la Coalición Asturiana PAS-UNA nel 1991, que lu conociera mientres la so militancia na Xunta Nacionalista Asturiana (XNA), proyeutu que cuayó na Unidá Nacionalista Asturiana (UNA) tres de la xuntura col Ensame Nacionalista Astur (ENA).

Foi na década de los 80 cuando Mori, tiempu nel que trabaya como profesor d'inglés na Escuela de Mines, s'avera al asturianismu, siempre dende la izquierda, llegando a dir nel puestu segundu na candidatura de la UNA nes eleiciones europees del 1989, que sumó más de 13.165 votos en tol estáu, y a ser cabezaleru na candidatura de la UNA al Senáu nel mesmu añu. "Nos años 80 axuntó la so conciencia política d'izquierda cola sensibilidá asturiana", esplica Carmona.

El "desengañu" que resultó la Coalición Asturiana afeutó a tola militancia y Mori nun foi una esceición. Sicasí, pese a nun tar en primer llinia de fueu, siguió trabayando na defensa d'Asturies y de los derechos de los trabayadores. Nos años últimos yera miembru activu na tertulia 25 de mayu, que se reúne una vegada al mes en dellos puntos d'Uviéu, normalmente en Ca Amparo, n'El Fontán.

"Nella participa xente asturianista de forma tresversal, esto ye, de toles ideoloxíes", esplica Fernando Ornosa, que lu recuperó pa la militancia política na refundada UNA, y p'acudir na llista eleutoral de Compromisu por Asturies (Bloque por Asturies-UNA) nes elecciones de 2011 n'Uviéu. Mori, con 83 años, ocupó'l númberu 8.

"Un asturianista de los pies a la cabeza"

Ornosa recuerda al uviedín como "un asturianista de los pies a la cabeza". "Yera una persona mui crítica, que decía les coses claramente, pero siempre ensin ofender a la otra persona", una opinión que tamién comparte Carmona. "Destacaba por ser mui impetuosu nel tratu, pero profundamente cariñosu", añade'l que fora presidente de Cruz Bermeya Xixón hasta xunu.

"Siempre taba sollerte a les cuestiones d'Asturies, políticamente y llingüísticamente", continúa Ornosa, que tamién fai referencia a la so faceta como profesor d'inglés. Y ye que Mori abrió nos años 50 una de les primeres academies na ciudá, la Cambridge School of English y foi ún de los mayores referentes nel enseñu de les llingües estranxeres n'Asturies. D'igual forma, foi ún de los fundadores de l'Asociación Asturiana d'Amigos de la Naturaleza (ANA), que nació tamién con un fondu componente antifranquista. "Yera un marxista agnósticu", añade, "un comunista asturianista que se comprometió col movimientu democráticu".

Persona mui conocida n'Uviéu, dexa un gran recuerdu na ciudá. "Siempre suel dicise lo mesmo cuando muerre dalguien, pero nesti casu ye verdá que yera mui bona pesona", afirma Carmona. Un bon exemplu ye la cantidá de xente que se dexó ver pel tanatoriu esta mañana, ente ellos Antonio Masip o l'actual alcalde d'Uviéu, Wenceslao López, amás de persones de la cultura asturiana, como Milio'l del Nido, Carlos Lastra o Ástur Paredes, por citar namás a dellos.

Al conocer la so muerte, otru de los que foi compañeru na primer etapa de la UNA y qu'anguañu coincidía con Mori na tertulia 25 de mayu, José Suárez Arias-Cachero "Felechosa", recordábalu en twitter calificándolu como "un patriota y un asturianu del mundu"

¡Adiós Paco Mori! Farewell Paco Mori! Despedimos a un patriota,a un asturianu del mundu,a un insumisu y a un amigu pic.twitter.com/k1wvI8oc0j

— José Suárez (@josesuarez) March 9, 2016

Dende Asturies.com queremos mandar un fondu abrazu a familiares y amigos de Mori, asina como a tol movimientu nacionalista asturianu.