Fina Pablo Ardisana, autor importante na evolución de la poética asturiana

|
Pablo Ardisana

El poeta de Ḥontoria escribió al amor con una forma diferente d'iguar la sonoridá.

Esta madrugada finó nel Hospital Universitariu Central d’Asturies (HUCA) el poeta Francisco Pablo Ardisana tres una llarga enfermedá que lu tuvo ingresáu l’últimu mes y mediu. Nacíu en Ḥontoria (Llanes) nel añu 1940 y llicenciáu en Xeografía y Historia pola Universidá d’Uviéu, tardaría en desendolcar la so producción lliteraria.

Foi nel añu 1982 cuando espubliza’l poemariu en castellanu ‘Única geografía’ –enantes, nel 1978, escribiera un ensayu, ‘Sobre la emigración tejera, sus posibles causas’–, apostando pol asturianu per primer vegada nel 1986 con ‘Armonía d’anxélica sirena’, cuando tenía 46 años d’edá y los autores más mozos de la segunda Xeneración del Surdimientu –nacíos nos años 60– dábense a conocer. Esti llibru supunxo una gran novedá pola so temática amorosa, estremada a lo escrito nesi tiempu, que destacaba polo so sonoridá.

Nun contar con una producción mui bayurosa nun impidió qu’Ardisana fora consideráu ún de los meyores poetes contemporáneos: ‘Rosamaría’ (1987),  ‘Azul mirar d’amor’ (1989), ‘Una luz inesperada’ (1991) y ‘Poemas del Ríomenor’ (2002) seríen les sos siguientes creaciones. La so obra apaeció en numberoses antoloxíes y inclusive llegó a ser musicada, como ye’l casu de Llan de Cubel o de la compositora Carla Armes.

Mui venceyáu al so pueblu y al so conceyu, destacó por entamar iniciatives culturales, como’l Premiu de Poesía Santa Rita de Cardosu, que creó nel 1994 xunto con Guillermo Fernández Buergo y Álvaro Ruiz de la Peña, y que precisamente ta acabante de recuperar l’Asociación Cultural La Volandina, qu’entama esti añu la so tercer edición tres les celebraes nel 1994 y 1995. “Sé que-y fixo muncha ilusión la noticia”, señala Begoña Collado, presidenta del coleutivu, que guarda parentescu por parte de padre con Ardisana, siendo’l propiu Ángel Collado l’encargáu de da-y la nueva nes sos habituales visites al escritor nel hospital.

“Tenía rellación con toles persones del pueblu, grandes o pequeños, y destacaba pola so sensibilidá, con una acidez y una ironía mui fina”, recuerda Begoña, que destaca que gracies a los sos versos s’averó a la lliteratura asturiana y a la poesía n’asturianu. El funeral por Ardisana va celebrase mañana, a les 17 hores, na ilesia de la parroquia de San Miguel de Ḥontoria.

Dende Asturies.com llamentamos esta gran perda pa la nuesa lliteratura y aprovechamos estes llinies pa mandar un fuerte abrazu a familiares y amigos.

Contador Estadistiques