Fina la Navidá y la TPA nun emitió nin un programa infantil o película d'animación n’asturianu

La llingua asturiana sigue arrequexada na RTPA. Una vegada finada la Navidá, y al contrariu que faen el restu d’autonómiques de comunidaes que cuenten con llingua propia, la televisión pública asturiana nun emitió nin un programa infantil o película d'animación pa la reciella en llingua asturiana, denuncia la XDLA.

Mentes que películes d’animación como la francesa ‘Astérix: Le domaine des dieux’ o la británica 'Paddington' “sí foron doblaes al so idioma” n’otres comunidaes autónomes, “la televisión asturiana fixo tolo contrario y emitió la versión en castellanu”, afirmen dende’l coleutivu cívicu, qu’apunta que “la nuestra televisión pública vuelve asina a convertise nun casu únicu ente les televisiones autonómiques del Estáu, amás d'incumplir la llexislación vixente, que diz que la cadena tien que promocionar el nuestru idioma. TPA discrimina l'asturianu, malgasta recursos públicos y nun crea puestos de trabayu al emitir estes películes infantiles en castellanu dando un pasu más na discriminación hacia la nuestra llingua llevada alantre pola direición encabezada por Antonio Virgili”.

Nun ye dalgo nuevo, yá qu’esti añu nun se dobló nenguna película al asturianu, siendo la última ‘Los Goonies’ nel 2017, y se dexaron d’emitir partíos de fútbol en llingua asturiana na televisión y na radio, “dalgo qu'enantes se facía una vez al mes –nun vaiga ser qu'emitiéndolos toles selmanes quedara claro que l'usu del nuestru idioma ye dalgo normal–“, a pesar de que nun suponen costu dalgún al ente por ser narraos polos propios comentaristes de la canal col sofitu de collaboradores. Otra manera, “los programes n'asturianu emitíos a lo llargo d'esti añu puen contase colos deos d'una mano y emítense a cuentagotes con temporaes más curties que los espacios en castellanu –nun contamos como programación n'asturianu gales musicales onde too val y predomina lo cutre, nin formatos culturales rotulaos n'asturianu pero onde'l castellanu ye la llingua vehicular–”, apunta la Xunta pola Defensa de la Llingua Asturiana (XDLA).

50 minutos selmanales na RPA

La situación na RPA ye tamién bien murnia. “Ye una emisora que dexa de llau la nuestra llingua y tamién la nuestra música, porque raru ye'l día nel que na cadena pue sentise un cantar n'asturianu, mesmo nos fines de selmana, onde más del 60 por cientu de la emisión ye una radiofórmula dominada polos cantares en castellanu y n'inglés”, esplica.

El restu de la selmana, la presencia del asturianu ye de 10 minutos diarios de llunes a vienres, l’informatiu del meudía, esto ye 50 minutos selmanales. “Una situación que tendría que poner coloraos a los sos xestores y a los políticos de la Xunta Xeneral que callen énte esta situación”, asegura’l coleutivu, que carga contra’l direutor xeneral: “RTPA sigue siendo'l güertu particular d'Antonio Virgili”.