Fina la fuelga de fame tres confirmase los 7 despidos de la EBHI

La empresa, de mayoría pública, nun solicitó la tasa de reposición. Prepárase un recibimientu al trabayador que lleva 37 díes n'ayunu a les 19 hores a la entrada d'El Musel.

"Resistimos fasta l'últimu segundu del plazu llegal, pero los responsables de too esto, empresa, Autoridá Portuaria y Gobiernu d'Asturies, prefieren el despidu de 7 compañeros y l'incumplimientu d'unos alcuerdos a cumplir cola llegalidá. Ellos son los únicos responsables", espresen los trabayadores. De los cuatro qu'entamaron la fuelga de fame, namái sigue Fernando González Rodríguez depués de que los sos compañeros tuvieran qu'abandonar el zarru por motivos de salú.

Ayeri finó'l plazu pa que les empreses públiques solicitaran la tasa de reposición, lo qu'European Bulk Handling Installation (EBHI) nun fixo, incumpliendo asina los sos compromisos colos trabayadores. Esta decisión supón el despidu en diferío de 7 emplegaos de la empresa, na que l'Autoridá Portuaria de Xixón tien un 68 por cientu de participación.

A les 19 hores d'esta tarde ta convocada una concentración pa recibir a González Rodríguez. "Saldremos cola victoria de la dignidá", reclamen los trabayadores.

Na semeya, ún de los paseos solidarios colos cuatro fuelguistes en L'Arbeyal, a la puerta d'El Musel.