Fina d’un infartu Sergio Marqués, presidente del país ente 1995 y 1999

|

L’ex presidente d’Asturies Sergio Marqués morrió esta mañana en Xixón a los 65 años. Según informó la so familia, el que fora políticu del PP y fundador d’URAS sufrió un infartu a la entrada de so despachu, onde exercía como abogáu.
 
Alertaos los efeutivos sanitarios, Marqués foi treslladáu n’estáu grave al Hospital de Cabueñes, onde los facultativos nun pudieron facer nada pa salvar la so vida. Nacíu en Xixón nel 1946, foi’l primer y únicu presidente asturianu del PP n’Asturies, pero’l so enfrentamientu con Francisco Álvarez-Cascos y otros dirixentes nacionales y estatales de la formación llevó a Marqués a frayar rellaciones colos populares y a fundar nel 1998 la formación rexonalista Unión Renovadora Asturiana (URAS), col que se presentó a les eleiciones del 1999 ensin ésitu.
 
Nel so mandatu Marqués tuvo’l sofitu del PAS pa sacar alantre dellos años los presupuestos xenerales, lo que permitió l’aprobación nel 1998 de la Llei d’Usu y Promoción del Bable/Asturianu, normativa tovía vixente. Consideráu por munchos como’l presidente d’Asturies que más miró pa la cultura del país, tamién impulsó los bolos nuna época complicada pa esti deporte autóctonu. El funeral por Marqués va celebrase mañana en San Pedro a les 18 hores.

Contador Estadistiques