Fina Chema Castiello

Persona de referencia na izquierda xixonesa, foi ún de los impulsores de Radio Kras y miembru del Grupo Eleuterio Quintanilla.

Esta mañana finó Chema Castiello, xixonés del 1952 nacíu na Gota Leche, tres una enfermedá diagnosticada'l branu pasáu que nun pudo superar. Doctor en Ciencies de la Educación pola Universidá d’Uviéu, foi profesor del IES Padre Feijoo, del que foi direutor, y un gran defensor de la educación pública y de la integración de los emigrantes.

Dende'l grupu de renovación pedagóxica Eleuterio Quintanilla trabayó por ello dende la so creación nel 1994. Pero la so militancia vieno de muncho enantes, siempre dende la izquierda.

Antifranquista, militó nel MCA y en Lliberación, y foi un destacáu nel movimientu contra la OTAN na década de los 80. Nesos años participó tamién na creación de Radio Kras, emisora alternativa nacida nel 1985.

Esti añu espublizó con Trabe 'Un guaje de barrio', obra n'asturianu con pincelaes autobiográfiques. 'Con maletas de cartón. La emigración española en el cine', 'El infierno de los vivos. La inmigración en la fotografía documental norteamericana' y 'Huellas de luz, registros de dolor' foron dalgunos de los sos trabayos previos.