Fin de selmana cargada d'actividaes nel país

|

La XX Fiesta de la Oficialidá, la XVI Nueche Folk de Fitoria, Los Exconxuraos y la Fiesta del Corderu son dalgunos de los principales eventos que se celebren estos díes.

Mañana tola actualidá va tar en Bimenes, onde se celebra la XX Fiesta de la Oficialidá, con actividaes dende'l meudía hasta bien entrada la madrugada. El Plenu municipal nel que se va declarar la oficialidá del asturianu, al igual que se fixo nel 1997, va centrar la xornada, pa depués dar pasu a la folixa con actuaciones musicales, una xinta popular pa 300 comensales, el concursu d'echadores de sidra, una Nueche en Danza y un conciertu folk.

Enantes, esta nueche celébrase la XVI Nueche Folk de Fitoria, coles actuaciones dende les 22 hores de Salón Bombé, Cerezal y Dixebra. Mui cerca, en Llanera, dan aniciu les fiestes de Los Exconxuraos, que güei tien como platu fuerte l'actuación, a partir de les 23 hores, de Desakato y Mala Reputación xunto cola orquesta Versión Original. La fiesta va continuar mañana y pasao nel Recintu Ferial de Llanera con decenes d'actividaes.

El domingu, mentes, ye'l turnu de la Fiesta del Corderu nel prau Ḷḷagüezos, cola participación de doce asadores. En total van preparase 60 corderos, a razón de cinco por asador, esto ye, unes 1.200 raciones que van tener un preciu de 20 euros. Nél va incluyíu la fiambrera, el pan y la servilleta. La xornada va tar amenizada poles bandes de gaites Güestia y Teixo- Manolo Quirós.

Contador Estadistiques