Filoloxía denuncia la desapaición de títulos

El decanatu de la facultá de Filoloxía dio esta mañana una rueda de prensa pa denunciar la situación en que dexa la reforma de les titulaciones que propón el Ministeriu d'Educación p'adaptase al espaciu común universitariu européu, na que les 16 titulaciones que se reconocen anguaño pasen a ser namás 4.

Nun escritu que firmen la decana Ana Cano, los vicedecanos Enrique del Teso y Aurelio González Ovies y la secretaria de la facultá María Cristina Valdés, los responsables de la facultá denuncien que la propuesta de catálogu de titulaciones que ta enriba la mesa ministerial contempla facer desapaecer delles de les titulaciones de más antigüedá, casu de la Filoloxía Románica, mientres qu'otres de gran demanda y especial demanda llaboral como la inglesa queden enxertes nun caxón que baxo'l nome "Llingües Modernes" propón amestar tolos estudios de llingües como l'inglés o'l Francés.

Dende'l decanatu nun son a entender una propuesta de reforma que desanicia tantes titulaciones de gran fondura científica y como se mecen otres nun revueltu qu'al paecer de los profesores nun tien xacíu dengún nin dende'l puntu de vista científicu nin dende'l funcional, como ye'l casu de la mentada titulación en "Llingües Modernes" que va suponer que más de 13.000 estudiantes de Fililoxía Inglesa y 5.000 de francesa pasen a tar nuna mesma titulación mientres qu'al empar se cree otra dedicada a "Llingües d'África y Asia" que va contar con poco más de 700 estudiantes, como sorrayó'l vicedecanu Enrique del Teso.

Los responsables de Filoloxía de la Universidá d'Uviéu, que llamenten tamién que la propuesta ministerial ofrez unes etiquetes pa les titulaciones pero nun detalla los conteníos de les mesmes, dicen que la situación actual que se vive na Universidá, y n'especial na so facultá, ye de "icertidume y confusión" . Los miembros del decanatu de la Facultá de Filoloxía d'Uviéu dicen que la so propuesta con vistes a la obligatoria reforma de les titulaciones partía d'afalar una cominatoria mayor de disciplines, non d'achaplar y reducir les titulaciones esistentes.

Nesti contestu de mengua del catálogu de titulaciones, la posibilidá de creación de la Filoloxía Asturiana ye dalgo que que s'acolumbra entovía más difícil. La decana de filoloxía y presidenta de l'Academia de la llingua Ana Cano dexó bien claro que de momentu nun hai nengún avance nesi sentíu.

La reducción de titulaciones afecta a toles universidaes españoles, como s'encargó de recordar Enrique del Teso, y asina al desapaecer la titulación de románica del catálogu oficial ello quier dicir que nenguna universidá española va poder dala. La reforma de les titulaciones p'adaptales al Espaciu Universitariu Européu yá ta funcionando n'Alemaña, y tolos estaos miembros de la UE tienen de facer otru tanto d'equí al 2010, que ye la fecha tope.

Si dende'l decanatu yá se da anuncia de que "la batalla ha llibrala cada Universidá española nel so mediu xeográficu y políticu y la Facultá de Filoloxía ta más que dimpuesta a ello" como s'anuncia nel comunicáu oficial que se repartió na rueda de prensa, dende les files del alumnáu la situación esmolez tanto o más que nel profesoráu. Hector Gómez navarro, representante de les asociaciones d'estudiantes enxertes na Federación que yá'l mes pasáu consiguió sacar a la cai a miles de persones en protesta pol proyectu de reforma de titulaciones, dio anuncia de que ta preparándose una campaña de movilizaciones coordinada n'ámbitu de toles universidaes europees y na que la universidá asturiana, "lo mesmo que cuando se plantegó por primer ocasión la privatización de la enseñanza universitaria, ha ser pionera nes movilizaciones" según declaró'l representante de los estudiantes.