Feve tiró la estación de Caces

Les parroquies de la parte sur d'Uviéu, onde s'asitien el balneariu de Les Caldes, el castiellu de Priorio y otros llugares d'abondu encantu, nun gana pa estrozos. Depués de que les nueves autovíes de circunvalación de la ciudá francieren dafechu'l tarrén o cuando'l castru de Cellagú va acabar comíu pola cantera de cementos Readymix Asland, la demolición de la vieya estación del ferrocarril vascu-asturianu en Caces vien a ser otra piedrina más nel efarraple del patrimoniu de les que se tienen ente les parroquies más guapes del conceyu.



Dos años depués de tirar la vieya estación de Fuso, la de Caces ta acabante de sufrir el mesmu destín. Construyía en 1904, de la que s'inauguró la llinia, la de Caces yera una de les más particulares del antiguu ferrocarril Vascu-asturianu, anguaño enxertáu na rede de FEVE. La estación, de pisu y planta alta con corredor pa la parte d'atrás, llevaba dende primeros de los noventa nun estáu d'abandonu que la empresa nun fizo por solucionar, hasta que, yá con tola madera podrecía, Feve optó por tirár de piqueta énte'l plasmu y la indignación de los vecinos, encariñaos cola vieya estación.

La de Caces nun yera la única estación en peligru de la llinia del vascu, que xuntaba la cuenca carbonera del Caudal y del Ayer col puertu de San Esteban. Si les d'Uviéu y la de Fuso tamién cayeron víctima de la piqueta, otres estaciones como la d'Ablaña, podríen llevar el mesmu camín, en cuantes que Feve ta llantando al llau d'elles impersonales marquesines prefabricaes que dexen a les vieyes estaciones ensin la última función que-yos quedaba como apeaderos.

Contador Estadistiques