El Festival Intercéltico d’Occidente (FIDO), con sede en Tapia, cumple la so mayoría d’edá

Esti miércoles inaugúrase en Tapia la decimoctava edición del Festival Intercéltico d’Occidente (FIDO). Agrupaciones procedentes d’Asturies, Galicia, Breizh y Xapón participen nesti certame de seis díes de llargor que tien na ‘Arribada del mundo celta’ la so actividá principal.

Esta iniciativa novedosa ye la gran apuesta d’esti añu del FIDO, que nesta ocasión nun va contar con ‘Noite Máxica’. Prevista pa les 22.30 hores del vienres, l’Arribada consiste na llegada per mar de toles bandes de gaites participantes, pa lo que la organización tien el sofitu de los marineros tapiegos. Tres el desembarcu, entamaráse el gran ‘Desfile da Lúa’, un pasucaies nuecherniegu que treslladará al públicu hasta la playa del Murallón, sede de la la primera Noite Folk, con actuaciones del gaiteru gallegu Óscar Ibáñez y de los xaponeses Harmonic Creams. La segunda va celebrase’l sábadu, tamién a les 23.30 hores, y va contar cola presencia de la violinista gallega Begoña Riobó y d’Anabel Santiago, amás d’una ‘Fest Noz’ a cargu de los bretones Folk Straka.

El festival inaugúrase esta tarde, a les 19 hores, nun actu coles autoridaes tres el que se va proceder al izáu de la bandera celta nel centru de la villa, anque ayeri celebróse la presentación del eventu. Nél, el direutor del certame, Martín Fernández Cascudo, fixo balance de los dieciocho años del mesmu y avanzó les más de 30 actividaes culturales que va vivir Tapia nestos díes próximos: “Nació como un intento de prebar una actividá nueva y dieciocho años depués equí siguimos con un cartelu nel que destacamos la nuesa forma de ver la música”, apuntó. Xunto a él tuvo l’alcalde, Enrique Fernández Castelao, que señaló que’l FIDO va propiciar “cinco díes d’actividá importante pa Tapia, yá que xenera movimientu cultural y tamién mueve la economía llocal”. Pela so parte, la edil de Cultura, Dulce Martínez, emponderó’l llabor de la Banda Gaitas Occidente, organizadora del certame.

Formaciones participantes

L’animación diurna del FIDO va correr a cargu de  les bandes de gaites Krevenn Kastell (Breizh), Pontenova de Salvaterra (Galicia), Soto Rei y la llocal Marino Tapiega, a lo qu’hai que sumar el grupu de danza bretona Cercle Celtique Bleunion Sivi. Mentes, les actuaciones nuecherniegues van protagonizales Mestura; El Koku La Manzana (mañana); Óscar Ibáñez y Harmonic Creams (vienres); Begoña Riobó, Anabel Santiago y Folk Straka (sábadu); y la Banda Gaitas El Trasno y Cerezal (domingu). Toles xornaes va tar abiertu nes places de la Constitución y Campogrande, n’horariu de 11 a 22 hores –esta tarde inaugúrase a les 19.15 hores–, un Mercáu Celta con 60 puestos d’artesanía y alimentación.

Na semeya, Martínez, Fernández Castelao y Fernández Cascudo.