Fernando Valle Roso presenta ‘Camín d’ayures’ nel Teatru Filarmónica

El cantante Fernando Valle Roso va actuar esti sábadu nel Teatru Filarmónica d’Uviéu pa presentar el so primer discu en solitariu, ‘Camín d’Ayures’. Tres esti conciertu, el llangreanu va facer una xira per delles poblaciones asturianes.

En ‘Camín d’ayures’ Valle Roso interpreta cantares populares y composiciones feches por María González onde s’amiesten la tonada y la tradición. Un trabayu que supón un chorru d’aire fresco a la canción asturiana y que, na so interpretación en direuto, cuenta cola participación de Xaime Arias (pianu), Michael Lee Wolfe (guitarres), Óscar Santos (baxu), Fernando Arias (batería), Pablo Carrera (gaita) y Silvia Moreno, Carla Isidoro y Carla Antuña (coros). L’actuación va principiar a les 20.30 hores y el preciu ye de 10 euros –los socios de la Sociedá Uviedina de Festexos tienen descuentu–.

Tres la presentación oficial del discu en direuto, el cantante llangreanu va llevar los cantares de ‘Camín d’ayures’ a delles poblaciones del país. Asina, Valle Roso va tar nel Teatru Toreno de Cangas del Narcea’l día 2 de febreru; nel Teatru Nuevu de La Felguera, el 8; nel Teatru Riera de Villaviciosa, el 8 de marzu; y nel Auditoriu Teodoro Cuesta de Mieres, el 13 d’abril.