“Fernando Largo traxo’l conocimientu y Elías García reciclólu a la tradición asturiana”, señala Barbero

|
“Fernando Largo traxo’l conocimientu y Elías García reciclólu a la tradición asturiana”, señala Barbero

Elías García comenzó a collaborar con Felpeyu tocando’l vigulín por necesidaes de la banda y finalmente integróse na formación. Anguaño, esta “figura clave de la reellaboración del folk asturianu”, como lu considera Ruma Barbero, tocaba’l bouzouki nel grupu, que’l sábadu tenía convocáu’l primer ensayu xeneral d’una etapa nueva.

Yera a les 18 hores, con Aníbal Menchaca como incorparación a la voz, pero pela mañana, a eso de les 11, llegaba la noticia que naide nunca espera. Una perda más qu’importante pa Felpeyu que se suma a les anteriores, igualmente dures, d’Ígor Medio y Carlos Redondo.

“Elías ye una figura clave de la reellaboración del folk asturianu. Garraramos el conocimientu de Fernando Largo, qu’en Radio Asturias, col programa ‘Gaitas, arpas y zanfonas’, dio a conocer les músiques que foron referentes pel mundu. El mesmu Elías reconocíalo, y él recicló esi conocimientu, metiólu nuna turmix y amestólu cola tradición asturiana”, apunta’l percusionista fundador de Felpeyu. Barbero califica amás a García de “instrumentista d’un nivel tan altu que ye difícil d’igualar”, destacando al empar la calidá de los cuerdistes de folk asturianu: “Tuvimos la suerte de tener a Elías, al igual qu’a dos siguidores de so al so altor, como Ígor o Rubén Bada, tanto instrumental como conceptualmente”.

La so etapa en Felpeyu

Sobre la etapa en Felpeyu de García, recuerda qu’entrara pa collaborar col vigulín en dos cantares del primer discu (1994), ‘Llevántate neña’ y ‘L’Ablanera’. Yá pal segundu, ‘Tierra’ (1997), formaba parte de la banda.

“Aportaba el so bon gustu como vigulinista. Prefería nun moyase nos arreglos porque vía qu’eso yera llabor d’Ígor, pa que Felpeyu tuviera un soníu propiu y nun se mimetizara con Llan de Cubel, anque nósotros podríemos consideranos los hermanos pequeños de Llan de Cubel”, esplica Barbero. Na época última, col bouzouki, “esperaba tamién a que los demás fixeren les sos aportaciones. Pa ‘Cerquina’ (2017), Lisardo traxo munches idees y Diego, tamién, mientres que yo ocupéme más de lletres. Él intervenía pa da-y el gustu precisu y esquisitu a caún de los temes”.

Ensin García, la etapa nueva de Felpeyu queda parada. La banda folk deberá encarar una reestructuración nueva, anque primero ha d’asimilar una perda que llora tola música asturiana.

Formación de Felpeyu na grabación de 'Cerquina', con García atrás nel centru y Barbero alantre a la derecha.

Contador Estadistiques