Fernando G.R. salió de la cárcele en llibertá provisional

L'asturianu Fernando G. R., deteníu'l pasáu 13 de setiembre baxo aplicación de la Llei Antiterrorista acusáu de cometer una riestra d'ataques con artefactos esplosivos contra sedes de partíos políticos y otres entidaes n'Asturies, salió ayeri de la cárcele de Segovia al declarar el xuez de l'Audiencia Nacional Félix Degayón la llibertá provisional baxo fianza que solicitare l'abogada del presu va yá delles selmanes.

L'importe de la fianza foi de 10.000 euros qu'aportó la familia del deteníu, según informó ayeri la plataforma d'amigos y familiares que dende'l momentu de la detención lleven denunciando lo que-yos abulta una actuación arbitraria y inxusta de la llei nel casu de Fernando G.R. acusáu d'un delitu xenéricu de terrorismu y que llevaba yá 100 díes en prisión, bien d'ellos en réxime d'aislamientu, priváu d'hores de patiu y de derechos qu'esfruten otros presos. La plataforma d'amigos y familiares declara que "l'aplicación de la llibertá provisional nun quita pa qu'a Fernando G.R. se-y siga aplicando inxustamente la Llei Antiterrorista y que lu vayan xulgar n'Audiencia Nacional". Según les persones más allegaes al deteníu, dase una "falta d'elementos que tengan pola acusación que fixere de mano la Delegación del Gobiernu n'Asturies, na que Fernando G.R. apaecía como l'autor de tolos atentaos ensin resolver n'Asturies dende el 2002" sorrayando los familiares y amigos del deteníu'l fechu de que "s'acuse a Fernando G.R d'ataques a sedes de partíos políticos qu'asocedieren al mesmu tiempu en llugares distintos".

En vista d'ello, la plataforma d'amigos y familiares pide que se llevante'l secretu de sumariu pa poder conocer les acusaciones concretes qu'enfrenta'l deteníu, que s'alcuentra yá en llibertá provisional dende'l vienres 23 pela tarde. La plataforma d'amigos y familiares de Fernando G.R. quixo tamién agradecer nel momentu de la lliberación "l'apoyu y la solidaridá de persones y colectivos que dende la detención de Fernando mostraron la so oposición a estos fechos" nos qu'albidren un intentu de criminalización de dellos movimientos sociales" y espliquen que-yos abulta que foi en gran parte gracies a la movilización y presión social que se concedió esta llibertá provisional. El xuiciu definitivu podría retrasase bastante y ello ye que l'Audiencia Nacional ta estragada de casos por atender. Los más allegaos a Fernando G.R. creen que'l xuiciu pue retrasase hasta la vuelta de trés años.