Fernando Alonso, terceru nos entrenos de Montecarlo

El pilotu asturianu del equipu Renault fizo'l tercer meyor tiempu na cronometrada definitiva pa dar l'orde de salida nel Gran Premiu de Montecarlo, que se cuerre mañana dende les 2 de la tarde a 78 vueltes peles cais de Mónaco. La plaza d'Alonso confirma'l bon andar de los Renault peles revesoses cais monegasques, nes que Jarno Trulli marcó la pole position, mientres que la revelación del añu,l'inglés Jenson Button (BAR-Honda) marcó'l segundu meyor tiempu, echando a Alonso por 12 milésimes de la primer llinia de salida. P'atopar el Ferrari del campeón Michael Schumacher hai que baxar hasta la cuarta plaza, per detrás de Fernando Alonso.

L'asturianu pudo marcar la pole, como demuestra'l que ficiere'l meyor tiempu nel primer parcial de la pista, pero na frenada de la chicane de la piscina,onde se baxa de 270 km/h a poco menos de 50, l'asturianu pasóse una migayay montó pelos bordes de la pista,perdiendo unes centésimes nes que tuvo la pole. Con too y con ello, la tercer plaza asefura una bona actuación mañana nuna pista na que l'adelantamientu ye casi imposible polo estrencho de la pista.

Anque'l pilotu de Williams Ralf Schumacher fizo meyor tiempu qu'Alonso y tendría d'ocupar la tercer plaza, los comisarios echáronlu p'atrás na parrilla por clasificase güei con unmotor nuevu, cosa castigada pol reglamentu que manda aguantar tol fin de selmana col mesmu motor. Alonso congracióse d'esta circunstancia y tamién del andar del coche, del que sorrayó que ye mui de fiar en distancies llargues, polo que cuenta con que dambos factores lu lleven al caxón tres de la carrera de mañana. En que plaza, ver verase dende mañana a les 2 de la tarde.