Fernando Alonso saca ventaya en casa del enemigu

El pilotu asturianu fizo un segundu puestu en Silverstone, el circuitu onde los McLaren Mercedes cuerren en casa y onde Alonso yá avisare a lo llargo de la selmana que se conformaba con poder acabar nel caxón. Con salir dende la pole, l'asturianu tuvo que dexar pasar a Montoya, el segundu pilotu de McLaren, que lu adelantó namás prendese'l semáforu verde marchando solu a pol primer trunfu de tola temporada pal colombianu, pero Alonso consiguió zarra-yos la puerta a tolos demás corredores y amarrar un segundu puestu que val muncho en cuantes que tres d'elli acabó na tercera posición Kimi Raikonen, qu'agora ta dos puntos más per detrás d'Alonso na xeneral. Pena p'Alonso foi que Fisichella, el segundu pilotu de Renault, caló'l coche nuna parada en boxes cuando diba terceru, un resultáu col que l'asturianu podía saca-y más puntos a Raikonen na xeneral echándolu a la cuarta plaza.

La carera polo tanto afitó les posibilidaes de Fernando Alonso pa ganar el mundial con un coche que ta un escalón perbaxo del McLaren Mercedes y al empar demostró que'l campeonatu ye un duelu a dos ente elli y el finlandés, en cuantes que pol probetayu rendimientu de los Ferrari nes últimes carreres, conózse que la Scuderia ta reculando nes prestaciones de los sos coches, y nin Schumacher nin Barrichello tan en condiciones de ser árbitrios del campeonatu. Otru tanto pasa con BAR-Honda y Toyota, que puen ser capaces de facer actuaciones espectaculares nes clasificaciones pero que nun son a cuayar en carrera.