Fernando Alonso punxo la emoción n'Imola

El circuitu d'Imola despidíose de la Fórmula 1 dempués de venticinco años col cuartu trunfu de Michael Schumacher na temporada. Tres d'elli, y nun circuitu que nun dexa un requexu p'adelantar, namás hebo un pilotu capaz de poner emoción, y esi foi otra vegada más Fernando Alonso, que ye l'amu de les remontaes. Trés lleva feches esti añu, y la d'ayeri llevolu hasta la cuarta plaza

El pilotu asturianu salía nuna estupenda sesta plaza de la parrilla, pero Ralf Schumacher, que salía al llau d'Alonso na quinta plaza, adelantóse una migaya al apagáu de les lluces encarnes de los semáforos. El pilotu asturianu confundíose por culpa de la maniobra del alemán y quixo siguilu, pero paró a tiempu. Lo que pasó foi qu'entós diose la lluz verde de verdá y Alonso, que taba frenáu viose superáu por tolos pilotos que veníen tres d'elli.

Entovía más, el Mclaren de Coulthard llegó a tocar col coche del asturianu y una pieza suelta del coche gris dio-y en cascu a Alonso, que fizo les primeres vueltes na novena plaza. El bon llabor de Renault nos boxes permitió que l'asturianu xubiere puestos, pasando a Trulli y Barrichello p'asitiase na quinta plaza.

Entós llegó l'apretón final, nel qu'Alonso llegó al altor de Ralf Schumacher y empezó a atosigalu. L'alemán abrióse nuna curva y Alonso espurrió pel güecu'l focicu del Renault, entós el Williams echo'l piesllu d'un volantazu y los dos coches tocáronse, anque la parte mala foi pal alemán, que salió despidíu fuera de la pista a la que volvió en sétima posición. Alonso entamó darréu la caza del primer Williams, en manes de Montoya. El colombianu, que diba al tran tran p'aguantar la mecánica y la tercer plaza, apretó en cuantes vio'l coche azul pelos espeyos, demostrando que la mecánica BMW entovía guarda mas caballos que'l motor del coche francés. Con too y con ello, Alonso y los técnicos del equipu tuvieron d'alcuerdu nuna cosa, y ye que les cubiertes Michelin nun rindieron a l'altor de les Bridgestone n'Italia