Fernando Alonso abandonó n'Austria

Nun fin de selmana en que too pintó mal pal equipu Renault, Fernando Alonso nun pudo nin acabar la carrera, anque ello nun quitó pa que l'asturianu enseñare otra vegada la so profesionalidá. Renault estrenaba nel rapidísimu y esixente circuitu A1 d'Austria una evolución nueva del motor que demostró que nun diba tolo bien que debiere. Intentando saca-y el meyor partíu, Alonso acabó fuera de la pista na vuelta bona de los entrenos del sábadu, polo que tuvo que salir el domingu dende atrás del too. La casa quixo más que saliere dende la llinia de boxes pa dir más cargáu de gasolina y nun alcontrar barullos na primer curva. Yendo a remontar, Alonso foi xubiendo posiciones hasta mangase'l cuartu, pero en saliendo d'echar gasolina, el motor del coche azul dixo que yá valía y dexó al asturianu tiráu por primer vegada esti añu.

Col trunfu de Schumacher, que yá va empatando tres primeros puestos seguíos, el mundial queda con Rakonen primeru con 40 puntos, Schumacher segundu con 38, Barrichello terceru con 26 y Alonso cuartu con 25. La siguiente carrera ye la de Mónaco, un circuitu estrenchu, malu d'adelantar y lentu onde Alonso ganó en Fórmula 3.000 saliendo de los últimos y nel que, yá en Fórmula 1 con Minardi, metió-y una vuelta al so compañeru d'equipu enantes d'abandonar.