Fernández ufre alcuerdos a IX y Podemos y diz nun contemplar al PP como alternativa

El presidente d'Asturies abrió esti llunes l'Alderique d'Orientación Política Xeneral, que se ta celebrando na Xunta Xeneral, con un discursu con ataques a Podemos y una referencia breve al asturianu y al gallego-asturiano. Sicasí, darréu ufrió a esta formación y a IX llegar a alcuerdos, ente ellos el presupuestu del 2017, refugando la posibilidá de tener al PP como alternativa.

Javier Fernández pidió de primeres que, pese a lo inevitable que considera separtar la política estatal y nacional, se centren n'Asturies, apuntando ensin citar direutamente a les dos formaciones d'izquierda que "tamién sería tramposu y cobarde abelluganos nes circunstancies del Estáu pa pretestar táutiques y decisiones eminentemente autonómiques. Vendría a ser un exemplu d'aquel sucursalismu políticu que tanto se maldixo, cuando s'afeaba que los intereses de la nuesa comunidá se supeditasen a les consignes centrales. Asturies esixe más coraxe. La partida nun se xuega namái nos sos 10.600 quilómetros cuadrados, del Eo a Tina Mayor, pero nun la convirtamos nun naipe que se sacrifica n'ofrenda a la estratexa de cada partíu. Pongámosla en primer planu y asumamos les nueses responsabilidaes".

Tres esti deséu, el líder socialista pasó a repasar la situación del país nuna llarga intervención na qu'hebo un güecu pequeñu pa la cuestión llingüística: "La promoción del asturianu y del gallego-asturiano figura nel haber de la Conseyería d'Educación y Cultura. D'alcuerdu con esi oxetivu, siguiremos trabayando pa que se reconoza la especialidá de profesoráu de Llingua Asturiana y Lliteratura, asina como pa fomentar el so usu institucional y nos medios de comunicación pública", afirmó.

Crítica al Executivu de Rajoy

Una vegada finalizaos los cinco bloques nos qu'estructuró la so intervención, Fernández criticó al Executivu central al que precisamente dio continuidá hai poco más d'una selmana cola astención que defendió dende'l so cargu de presidente de la xestora del PSOE, calificándolu como "un Gobiernu testerón nel so desinterés hacia las necesidaes d'Asturies". Darréu señaló como segundu problema del país nun algamar que la pluralidá de la Xunta Xeneral "fora productiva" y punxo l'exemplu d'hai un añu, cuando la propuesta de presupuestos tuvo cuatro enmiendes a la totalidá.

"Recuerden lo asocedío. El Partido Popular presentó la so enmienda ensin lleer el proyeutu de presupuestos. Podemos camuflóse nun simulacru cobarde pa retrasar la enmienda a la totalidá hasta los minutos últimos, depués de que yá se celebraren les eleiciones xenerales. En nengún caso consideróse la posibilidá de presentar enmiendes parciales", apuntó pa depués ufrir diálogu a tolos grupos parllamentarios, centrándose sobre manera nos de la izquierda. "Esmoléceme que por xuegos táuticos, por cálculos internos o por resentimientu incrustáu contra'l Partido Socialista, la mayoría de 28 escaños qu'hai nesta Xunta nun sía quien per segunda vegada d'acordar un presupuestu nutríu de polítiques de progresu p'Asturies", aseguró dexando de llau la posibilidá de llegar a alcuerdos col PP apuntando que "la xestión realizada tien una orientación progresista inequívosa y nin entre los mios deseos nin los mios planes ta buscar otru norte".

"Señoríes, faigo-yos una invitación espresa a negociar y acordar pol bien d'Asturies. Ye una invitación dirixida a tolos grupos parllamentarios, y sobre manera a la izquierda. Con vustedes, colos diputados d'Izquierda Xunida y Podemos, abrirmos una negociación fiscal que venceya, lóxicamente, el presupuestu próximu. Llegáu esti puntu nun ye necesario destacar la importancia de dambas cuestiones, que merecen un esfuerciu seriu d'entendimientu. Aseguro-yos que'l Gobiernu ta dispuesto a facelo, a intentalo hasta la fatiga, pero non a perder el tiempu. Si entienden que ye imposible, nun faigan simulacros; nun engañen. Yo, insisto una vegada más, quiero aldericar y pautar con vustedes", fino la so intervención. El debate sobre l'estáu del país va siguir mañana cola intervención de los voceros de los grupos de la oposición.