Fernández Muñiz defende una desescalada conxunta coordinada pol ministeriu

Mientres n’otres autonomíes, como Galicia o Castilla y Lleón, yá se reclama una vuelta a la normalidá por territorios, el conseyeru de Salú, Pablo Ignacio Fernández Muñiz, defendió esti xueves una desescalada coordinada pol Ministeriu de Sanidá xunto coles comunidaes. Adrián Barbón entovía nun se pronunció al respeuto.

“La planificiación debe ser siempre bien coordinada col restu de comunidaes autónomes y bien coordinada col Ministeriu de Sanidá, inclusive coordinada de manera afayadiza con otros ministerios y con otres conseyeríes dientro de la comunidá autónoma del Principáu d’Asturies”, apuntó ayeri’l conseueru na so intervención en llinia pa la prensa pa informar sobre la COVID-19 tres caltener una reunión telématica de Conseyu Interterritorial de Salú col ministru y el restu de conseyeros. A la entruga de los medios sobre si, no que respeuta a la desescalada, “Asturies defenderá un tratamientu específicu a la situación específica a cada comunidá autónoma y cómo considera que debe ser ésa nel Principaú”, Fernández Muñiz centróse en responder que nel país “crearánse dos comisiones de trabayu, una de calter políticu, cola participación de delles conseyeríes; y otra de perfil téunico, que presidirá’l direutor xeneral de Salú Pública, Rafael Cofiño, y contará con espertos de salú pública de la conseyería y con asesores esternos”, ensin pronunciase na primer cuestión.

Esta falta de posicionamientu, que dexa entever un refugu a la desescalada por territorios dende’l Gobiernu, choca cola postura defendida por, ente otros, los presidentes de comunidaes vecines, como Galicia y Castilla y Lleón, que yá se posicionaron a favor d’una salida asimétrica de la reclusión. Tres la reunión de presidentes del domingu, Barbón comunicó la posibilidá de que se fixera asina y llendóse en señalar que de siguir esti plan ésti “tien que facese con precisión de ciruxanu” y con “supresión de movilidá ente territorios porque nun serviría de nada” por un posible “efeutu rebote como indica la Organización Mundial de la Salú”.

Otra manera, Fernández Muñiz defendió la posibilidad de facer “pilotaxes en zones llocalizaes pa tener cierta esperiencia y compartila ente les comunidaes autónomes” de cara al procesu de desescalada.

Los datos d’ayeri

Les cifres aportaes pola Conseyería de Salú sobre la COVID-19 nel país amosaron un aumentu de 60 casos positivos nuevos p’asitiar el total en 2.230. Na xornada procesáronse 769 muestres pa determinación de la COVID-19 por PCR (25.624 dende l'entamu del andanciu) y 731 por test d'anticuerpos (2.971), polo que van feches 28.595 pruebes.

Les muertes algamen yá les 174 tres sumar 6 ayeri, cuando hebo 23 curaciones (545). Nun hebo movimientu nel númberu de pacientes na UCI y planta, con 61 y 367 de manera respeutiva.

Na semeya Fernández Muñiz atiende a la prensa de manera telemática acompañáu pol coordinador del Observatoriu de Salú, Mario Margolles, y pol direutor xeneral de Cuidaos, Humanización y Atención Sociosanitaria, Sergio Valles.